ന്യൂഡല്‍ഹി: രാജ്യം മുഴുവന്‍ കൊവിഡിനെതിരായ പോരാട്ടത്തില്‍ മുഴുകുമ്പോഴും ഡല്‍ഹി പൊലിസിന്റെ ശ്രദ്ധ സി.എ.എ വിരുദ്ധ സമരക്കാരെ വേട്ടയാടുന്നതില്‍. ജാമിഅ മില്ലിയ കോര്‍ഡിനേഷന്‍ കമ്മിറ്റിയുടെ മീഡിയാ കോര്‍ഡിനേറ്റര്‍ സഫൂറ സര്‍ഗര്‍ അറസ്റ്റ് ചെയ്തിരിക്കുകയാണ് ഡല്‍ഹി പൊലിസ്. വടക്ക്-കിഴക്കന്‍ ഡല്‍ഹിയിലെ ജാഫറാബാദ് ഏരിയയില്‍ പൗരത്വ വിരുദ്ധ സമരം സംഘടിപ്പിച്ചു എന്ന കുറ്റം ചുമത്തിയാണ് സഫൂറയെ പൊലിസ് അറസ്റ്റ് ചെയ്തത്.

ജാഫറാദില്‍ സ്ത്രീകളുടെ വന്‍ പ്രതിഷേധം സംഘടിപ്പിക്കാന്‍ കാരണം സഫൂറയാണെന്ന് ഡല്‍ഹി പൊലിസ് ജോ. കമ്മീഷണര്‍ അലോക് കുമാര്‍ പറഞ്ഞു. ഈ സമരമാണ് പിന്നീട് അക്രമാസക്തമായതെന്നും ഐ.ബി ഉദ്യോഗസ്ഥന്‍ അങ്കിത് ശര്‍മ്മയും പൊലിസുകാരനായ രത്തന്‍ലാലുമടക്കം 53 പേര്‍ക്ക് ജീവന്‍ നഷ്ടമാകുന്നതിലേക്ക് വഴിവെച്ചതെന്നും പൊലിസ് പറയുന്നു.

പ്രദേശത്ത് വര്‍ഗീയ കലാപം നടത്താന്‍ ഗൂഡാലോചന നടത്തിയെന്നാരോപിച്ച് മീരാന്‍ ഹൈദര്‍ എന്ന ഗവേക വിദ്യാര്‍ത്ഥിയെ ഏപ്രില്‍ രണ്ടിന് പൊലിസ് അറസ്റ്റ് ചെയ്തിരുന്നു. ആര്‍.ജെ.ഡി യൂത്ത്‌വിങ് ഡല്‍ഹി യൂനിറ്റ് പ്രസിഡന്റ് ആണ് മീരാന്‍.

പൗരത്വ നിയമ വിരുദ്ധ സമരവുമായി ബന്ധപ്പെട്ട് അറസ്റ്റിലായ ജാമിഅ മില്ലിയ വിദ്യാര്‍ത്ഥികളുടെ കസ്റ്റഡി ഡല്‍ഹി കോടതി ഏപ്രില്‍ ആറിന് ഒമ്പത് ദിവസത്തേക്ക് കൂടി നീട്ടിയിരുന്നു.