കൊച്ചി: വാടകയ്ക്ക് താമസിക്കുന്ന വീടിന്റെ മുറ്റത്ത് കഞ്ചാവ് ചെടി വളര്‍ത്തിയതിന് എട്ടു യുവാക്കളെ എറണാകുളം സെന്‍ട്രല്‍ പൊലിസ് അറസ്റ്റു ചെയ്തു. പവര്‍ഹൗസ് റോഡ് കെ.കെ പത്മനാഭന്‍ റോഡില്‍ വാടകയ്ക്ക് താമസിച്ചിരുന്ന യുവാക്കളാണ് പിടിയിലായത്. വടുതല സ്വദേശി കണ്ണന്‍, കൊല്ലം സ്വദേശികളായ യദു കൃഷ്ണന്‍, അജേഷ്, പാലക്കാട് സ്വദേശി വിഷ്ണു, ജെയ്‌സണ്‍, സായി ശങ്കര്‍, അരുണ്‍രാജ്, അമല്‍ബാബു എന്നിവരാണ് അറസ്റ്റിലായത്.
പിടിയിലായവരെല്ലാം നഗരത്തിലെ മാളിലെ ജീവനക്കാരാണ്. ഇവര്‍ വാടകയ്ക്ക് താമസിച്ചിരുന്ന വീട് കേന്ദ്രീകരിച്ച് മയക്കുമരുന്ന് ഉപയോഗം നടക്കുന്നതായ വിവരത്തെ തുടര്‍ന്നാണ് പൊലിസ് ഞായറാഴ്ച വൈകിട്ട് പരിശോധനയ്‌ക്കെത്തിയത്. തിരച്ചിലില്‍ വീടിന്റെ മുമ്പിലായി പറമ്പില്‍ നട്ടുവളര്‍ത്തിയ നിലയില്‍ കഞ്ചാവു ചെടി കണ്ടെത്തുകയായിരുന്നു. തുടര്‍ന്ന് വീടിനുള്ളില്‍ നടത്തിയ പരിശോധനയില്‍ കഞ്ചാവും കഞ്ചാവ് വലിക്കുന്നതിന് തയ്യാറാക്കിയ ഹുക്കകളും പിടിച്ചെടുത്തു.
ഹുക്കകള്‍ക്കു പുറമേ പ്ലാസ്റ്റിക് കുപ്പികള്‍ ഉപയോഗിച്ച് തയ്യാറാക്കിയ ഉപകരണങ്ങളും കണ്ടെടുത്തിട്ടുണ്ട്. എറണാകുളം അസി കമ്മീഷണര്‍ കെ.വി വിജയന്‍, സെന്‍ട്രല്‍ എസ്.ഐ വി വിമല്‍ എന്നിവരുടെ നേതൃത്വത്തിലുള്ള സംഘമാണ് പ്രതികളെ അറസ്റ്റു ചെയ്തത്. പ്രതികളെ തിങ്കളാഴ്ച കോടതിയില്‍ ഹാജരാക്കും. ഇവര്‍ക്ക് കഞ്ചാവ് നല്‍കിയിരുന്ന ഇടനിലക്കാരിലേക്കും അന്വേഷണം നീങ്ങുന്നുണ്ട്.