തിരുവനന്തപുരം: കൊവിഡ് വ്യാപന ഭീഷണിയുടെ പശ്ചാത്തലത്തില്‍ സംസ്ഥാനത്തെ ജയിലുകളിലുള്ള കൂടുതല്‍ തടവുകാര്‍ക്ക് പ്രത്യേക പരോള്‍ അനുവദിക്കുന്നു. സുപ്രിം കോടതി ഉത്തരവിന്റെ ചുവടു പിടിച്ച് പരമാവധി പേര്‍ക്ക് പരോള്‍ നല്‍കി ജയിലില്‍ കഴിയുന്ന തടവുകാരുടെ എണ്ണം കുറയ്ക്കാനാണ് സര്‍ക്കാര്‍ തീരുമാനം. ഇളവുകള്‍ക്ക് പുറമേ ശിക്ഷയുടെ മൂന്നില്‍ രണ്ടുഭാഗം പൂര്‍ത്തിയാക്കിയ തടവുകാര്‍ ഉള്‍പ്പെടെയുള്ളവര്‍ക്ക് നിബന്ധനകള്‍ക്ക് വിധേയമായി പരോള്‍ അനുവദിക്കും. ശിക്ഷ അനുഭവിക്കുന്ന തടവുകാരും വിചാരണത്തടവുകാരും ഉള്‍പ്പെടെ 1,322 തടവുകാരെ പ്രത്യേക പരോളും ഇടക്കാല ജാമ്യവും നല്‍കി നേരത്തെ പുറത്തുവിട്ടിരുന്നു. ഇതുകൂടാതെ പുതിയ തീരുമാനത്തിലൂടെ 500ന് മുകളില്‍ തടവുകാര്‍ക്ക് പരോള്‍ ലഭിക്കുമെന്നാണ് ജയില്‍ അധികൃതര്‍ പറയുന്നത്.
ലോക്ക് ഡൗണിന് മുന്‍പ് പരോള്‍ അനുവദിക്കുകയും പൊതുഗതാഗത സൗകര്യം ഇല്ലാത്തതിനാല്‍ ജയിലേക്ക് മടങ്ങിവരാന്‍ കഴിയാത്തവരുമായ തടവുകാര്‍ക്ക് തിരികെ ജയിലില്‍ എത്താനുള്ള സമയം 30വരെ നീട്ടിയിരുന്നു. 15ന് മടങ്ങിയെത്തണമെന്നായിരുന്നു നേരത്തെ നല്‍കിയ നിര്‍ദേശം. പോക്‌സോ കേസുകള്‍, ബലാത്സംഗം, കുടുംബപ്രശ്‌നങ്ങളെത്തുടര്‍ന്ന് ശിക്ഷിക്കപ്പെട്ടവര്‍, ഭാര്യ, ഭര്‍ത്താവ്, മക്കള്‍, അച്ഛന്‍, മരുമക്കള്‍ തുടങ്ങിയവര്‍ കൊലചെയ്യപ്പെട്ട സംഭവങ്ങളില്‍ ജയിലിലായവര്‍, ടാഡ, പോട്ട, യു.എ.പി.എ, ഔദ്യോഗിക രഹസ്യ നിയമം, മനുഷ്യക്കടത്ത് തുടങ്ങിയ കേസുകളില്‍പ്പെട്ടവര്‍ ഒഴികെയുള്ള 60 വയസുകഴിഞ്ഞ പുരുഷ തടവുകാര്‍ക്കും 50 വയസുകഴിഞ്ഞ സ്ത്രീ തടവുകാര്‍ക്കും കുറ്റകൃത്യത്തിന്റെ സ്വഭാവം വിലയിരുത്തി 30 ദിവസത്തെ പരോള്‍ അനുവദിച്ചിട്ടുണ്ട്. കൂടുതല്‍ പേര്‍ക്ക് പരോള്‍ അനുവദിക്കുന്നതു സംബന്ധിച്ച് ജയില്‍ ഡി.ജി.പി ഋഷിരാജ് സിങ് നല്‍കിയ ശുപാര്‍ശ മുഖ്യമന്ത്രി അംഗീകരിച്ചതോടെയാണ് കൂടുതല്‍ പേര്‍ക്ക് പുറത്തിറങ്ങാന്‍ അവസരമൊരുങ്ങുന്നത്.