ചങ്ങരംകുളം: ആസൂത്രണത്തിലെ പാളിച്ച കാരണം കോള്‍ മേഖലയില്‍ നടപ്പാക്കിയ 'ഒരു നെല്ലും ഒരു മീനും' പദ്ധതി നഷ്ടത്തില്‍. നെല്‍കൃഷിയോടൊപ്പം കര്‍ഷകര്‍ക്ക് അധികവരുമാനം ലഭിക്കാന്‍ പൊന്നാനി കോള്‍ മേഖലയില്‍ ഫിഷറീസ് വകുപ്പ് നടപ്പാക്കിയ പദ്ധതിയാണ് ലക്ഷ്യം കാണാതെപോയത്.
പാടശേഖരങ്ങളില്‍ ആറു മാസം നെല്ലും ബാക്കി ആറു മാസം മീനും കൃഷി ചെയ്യുന്നതിനാണ് ഉദ്ദേശിച്ചിരുന്നത്. കഴിഞ്ഞ വര്‍ഷം ജൂലൈ അവസാനത്തില്‍ ലക്ഷക്കണക്കിനു മത്സ്യക്കുഞ്ഞുങ്ങളെ വിവിധ പാടശേഖരങ്ങളില്‍ ഇറക്കിയെങ്കിലും പകുതി പോലും കിട്ടിയില്ല. കൊയ്ത്തു കഴിയുന്നതിനൊപ്പം കാലവര്‍ഷത്തിന്റെ ആരംഭത്തിലാണ് മത്സ്യക്കൃഷി ആരംഭിക്കേണ്ടത്.
എന്നാല്‍ പദ്ധതി തുടങ്ങാന്‍ രണ്ടു മാസം വൈകി. അടുത്ത നെല്‍ക്കൃഷി ഇറക്കുന്നതിനായി പാടശേഖരങ്ങളില്‍ വെള്ളം വറ്റിച്ചുതുടങ്ങുമ്പോള്‍ പ്രായമാകാതെ മത്സ്യങ്ങളെ പിടിച്ചെടുക്കേണ്ട അവസ്ഥയാണ്. ആറു മാസം വളര്‍ച്ചയെത്തിയാലെ മതിയായ തൂക്കവും വിലയും ലഭിക്കുകയുള്ളൂ. 500 ഏക്കറിലാണ് കഴിഞ്ഞ വര്‍ഷം പദ്ധതി നടപ്പാക്കിയത്.
നിശ്ചിതതുക നിശ്ചയിച്ചു മത്സ്യം പിടിക്കാന്‍ ലേലം നല്‍കിയെങ്കിലും ലേലം ഏറ്റെടുത്ത കരാറുകാരനു മതിയായ മത്സ്യം ലഭിച്ചില്ല. കൂടാതെ കുഞ്ഞുങ്ങളുടെ നഴ്‌സറി ഒരുക്കാന്‍ കര്‍ഷകര്‍ക്കു ചെലവായ ഒരു ലക്ഷം രൂപ ഫിഷറീസ് വകുപ്പ് ഇതുവരെയും നല്‍കിയിട്ടില്ലെന്നും പാടശേഖര കമ്മിറ്റി പ്രതിനിധികള്‍ ആരോപിച്ചു.