തിരുവനന്തപുരം: ലോക്ക് ഡൗണ്‍ ലംഘനവുമായി ബന്ധപ്പെട്ട് സംസ്ഥാനത്ത് പിടുച്ചെടുത്ത വാഹനങ്ങള്‍ താല്‍ക്കാലികമായി ഉടമയ്ക്ക് വിട്ടുകൊടുക്കാന്‍ സംസ്ഥാന പൊലിസ് മോധാവി ലോക്‌നാഥ് ബെഹ്‌റ പൊലിസ് മേധാവികള്‍ക്ക് നിര്‍ദേശം നല്‍കി.

അതേ സമയം പൊലിസ് ആവശ്യപ്പെടുമ്പോള്‍ ഹാജരാകണമെന്ന് എഴുതി വാങ്ങിയ ശേഷമാണ് വാഹനങ്ങള്‍ വിട്ടുനല്‍കുക.ആദ്യം പിടിച്ചെടുത്ത വാഹനങ്ങള്‍ ആദ്യം എന്ന ക്രമത്തിലാകും വിട്ടുകൊടുക്കുക.

ഇതുവരെയായി 30000ത്തോളം വാഹനങ്ങളാണ് സംസ്ഥാനത്തൊട്ടാകെ പൊലീസ് പിടിച്ചെടുത്തത്. അതേ സമയം വരും ദിവസങ്ങളിലും പരിശോധനയില്‍ യാതൊരു വിട്ടുവീഴ്ചയും ഉണ്ടാകില്ലെന്ന് പൊലീസ് അറിയിച്ചിട്ടുണ്ട്

വാഹനങ്ങള്‍ പിടിച്ചെടുക്കാതെ പിഴ മാത്രം ഇടാക്കി വിട്ടയക്കുന്ന കാര്യം പരിശോധിക്കാന്‍ മുഖ്യമന്ത്രിയാണ് ഡിജിപിക്ക് നിര്‍ദ്ദേശം നല്‍കിയത്.ഇക്കാര്യത്തില്‍ എജിയുടെ നിയമോപദേശത്തിന് ശേഷം തിങ്കളാഴ്ചയോടെ തീരുമാനമുണ്ടാകുമെന്ന് ലോക്നാഥ് ബെഹ്റ പറഞ്ഞു.