ശ്രീകണ്ഠപുരം: ചെങ്ങളായി പഞ്ചായത്തിലെ പല കാര്യങ്ങളിലും പ്രതിപക്ഷ മെമ്പര്‍മാരെ അറിയിക്കാതെ ഭരണപക്ഷം ഏകപക്ഷീയമായി കാര്യങ്ങള്‍ ചെയ്യുകയാണെന്ന് യു.ഡി.എഫ് ആരോപിച്ചു.
വളക്കൈ പഞ്ചായത്ത് ഹാളില്‍ നടന്ന ചെങ്ങളായി പഞ്ചായത്ത് കുടുംബശ്രീ സി.ഡി.എസ് യോഗത്തില്‍ ചെങ്ങളായി പഞ്ചായത്തിലെ യു.ഡി.എഫ് ഭരണസമിതി അംഗങ്ങളെ പങ്കെടുപ്പിക്കുകയോ അറിയിക്കുകയോ ചെയ്തിട്ടില്ല. പി.കെ ശ്രീമതി എം.പി ഉദ്ഘാടനം ചെയ്യുന്ന പരിപാടിയാണിത്. ചെങ്ങളായി പഞ്ചായത്ത് നടത്തിയ വൃക്ഷത്തൈ വിതരണ ഉദ്ഘാടനവും പ്രതിപക്ഷ അംഗങ്ങളെ അറിയിക്കാതെ കുടുംബശ്രീ വഴിയാണ് നടത്തിയത്.
ഭരണസമിതിയും സി.ഡി.എസും സി.പി.എം പാര്‍ട്ടി സമ്മേളനം പോലെ സര്‍ക്കാര്‍ പരിപാടികള്‍ നടത്തുകയാണെന്ന് പ്രതിപക്ഷ അംഗങ്ങള്‍ ആരോപിച്ചു. കുടുംബശ്രീയെ ഭരണസമിതിയും സി.ഡി.എസും രാഷ്ട്രീയവല്‍ക്കരിക്കുന്നതിനെതിരേ ചെങ്ങളായി പഞ്ചായത്തിലെ പ്രതിപക്ഷ അംഗങ്ങള്‍ പ്രതിഷേധം രേഖപ്പെടുത്തി. പഞ്ചായത്ത് അംഗങ്ങളായ വി.കെ വിജയകുമാര്‍, പി. ദിനേശന്‍, മൂസാന്‍കുട്ടി തേര്‍ളായി, റിന്‍സി ജോണ്‍സന്‍, പി. നഫീസ, മിസ്‌റിയ തേര്‍ളായി, കെ.പി റംലത്ത് സംസാരിച്ചു.