തിരുവനന്തപുരം: കെവിന്‍ വധവുമായി ബന്ധപ്പെട്ട് ആരോപണ വിധേയരായ ഡിവൈ.എസ്.പിമാര്‍ക്ക് സ്ഥലം മാറ്റം. കോട്ടയം ഡിവൈ.എസ്.പി ഷാജിമോന്‍ ജോസഫിനും കോട്ടയം ജില്ലാ സ്‌പെഷല്‍ ബ്രാഞ്ച് ഡിവൈ.എസ്.പി ജെ.സന്തോഷ്‌കുമാറിനെയുമാണ് സ്ഥലംമാറ്റിയിരിക്കുന്നത്. ഇവരെ യഥാക്രമം ഇടുക്കി സ്‌പെഷല്‍ ബ്രാഞ്ച് സി.ഐ.ഡിയുടെയും തിരുവനന്തപുരം റൂറലിന്റെയും ഡിവൈ.എസ്.പിമാരായാണ് നിയമിച്ചിരിക്കുന്നത്. കോട്ടയം ജില്ലാ ക്രൈംറെക്കോഡ്‌സ് ബ്യൂറോയിലായിരുന്ന പാര്‍ഥസാരഥി പിള്ള ആണ് ജില്ലാ സ്‌പെഷല്‍ ബ്രാഞ്ചിന്റെ പുതിയ ഡിവൈ.എസ്.പി. ഇടുക്കി സ്‌പെഷല്‍ബ്രാഞ്ച് സി.ഐ.ഡി ഡിവൈ.എസ്.പി ആയിരുന്ന ആര്‍.സന്തോഷ്‌കുമാര്‍ ആണ് കോട്ടയം ഡിവൈ.എസ്.പി. ശ്രീജിത്ത് കസ്റ്റഡിയില്‍ കൊല്ലപ്പെട്ട ആലുവയിലെ ഡിവൈ.എസ്.പി പ്രഫുല്ലചന്ദ്രനെ കൊച്ചി സ്‌പെഷല്‍ ബ്രാഞ്ചിലേക്കും മാറ്റിയിട്ടുണ്ട്. ആകെ 20 ഡിവൈ.എസ്.പിമാരെ സ്ഥലംമാറ്റിക്കൊണ്ടുള്ള ഉത്തരവാണ് ഇന്നലെ പുറത്തിറങ്ങിയത്.
മുതിര്‍ന്ന ഡിവൈ.എസ്.പി എ.അബ്ദുല്‍ റാഷിയെ വിജിലന്‍സ് ആന്‍ഡ് ആന്‍ഡി കറപ്്ഷന്‍ ബ്യൂറോ പ്രത്യേക അന്വേഷണസംഘം രണ്ടിന്റെ എസ്.പിയായി സ്ഥാനക്കയറ്റം നല്‍കി നിയമിച്ചിട്ടുണ്ട്. ഏഴ് സി.ഐമാര്‍ക്കും ഡിവൈ.എസ്.പിമാരായി സ്ഥാനക്കയറ്റം ലഭിച്ചിട്ടുണ്ട്.