വാടാനപ്പള്ളി: തളിക്കുളം പുതുക്കുളം കിഴക്ക് ഗൃഹനാഥനെ മര്‍ദിച്ചുകൊലപ്പെടുത്തിയ കേസില്‍ മകനെ വാടാനപ്പള്ളി പൊലിസ് അറസ്റ്റു ചെയ്തു. എടത്തിരുത്തി കൊട്ടുക്കല്‍ സത്യനെ (65) കൊലപ്പെടുത്തിയ കേസില്‍ പൊലിസ് കസ്റ്റഡിയിലുണ്ടായിരുന്ന മകന്‍ സലീഷിന്റെ (30)അറസ്റ്റാണു ഇന്നലെ രേഖപ്പെടുത്തിയത്.
കോണ്‍ക്രീറ്റ് ഇഷ്ടിക ചീളുകൊണ്ടു ഇടിച്ചാണു കൊലപ്പെടുത്തിയത്. ശരീരമാസകലം മര്‍ദനമേറ്റിട്ടുണ്ടെന്നു പോസ്റ്റ് മോര്‍ട്ടം റിപ്പോര്‍ട്ട് വ്യക്തമാക്കുന്നു. ഹൃദയത്തിനും തലയ്ക്കുമേറ്റ ക്ഷതവും തലയിലെ ആന്തരിക രക്തസ്രാവവുമാണു മരണ കാരണം. ഇരു വശങ്ങളിലെയും വാരിയെല്ലുകള്‍ തകര്‍ന്നിട്ടുണ്ട്. കോണ്‍ക്രീറ്റ് കട്ടകൊണ്ടു ഇടിച്ചതിനു പുറമെ ചവിട്ടുകയും കൈമുട്ടുകൊണ്ടു ഇടിക്കുകയും നിലത്തു വലിച്ചിഴക്കുകയും ചെയ്തിട്ടുണ്ട്. തൃശൂര്‍ ഗവ.മെഡിക്കല്‍ കോളജിലായിരുന്നു പോസ്റ്റ് മോര്‍ട്ടം.
കഴിഞ്ഞ ബുധനാഴ്ച വൈകിട്ട് നാലോടെയായിരുന്നു കൊലപാതകം. മദ്യലഹരിയില്‍ സലീഷ് പിതാവുമായി വീട്ടുമുറ്റത്തു വച്ചു വഴക്കിടുകയും മര്‍ദിക്കുകയും വലിച്ചിഴച്ചു കിടപ്പു മുറിയില്‍ കൊണ്ടുവന്നിടുകയുമായിരുന്നു. പല ദിവസങ്ങളിലും സലീഷ് പിതാവിനെ മര്‍ദിക്കാറുണ്ടായിരുന്നുവെന്ന് പൊലിസ് പറഞ്ഞു.
പിന്നീടു വീട്ടിലെത്തിയ ഭാര്യയും മകളും നാട്ടുകാരുടെ സഹായത്തോടെയാണു സത്യനെ ആശുപത്രിയിലെത്തിച്ചത്. അവിടെ എത്തും മുന്‍പേ മരണം സംഭവിച്ചിരുന്നു. കൊല്ലപ്പെട്ട സത്യന്‍ ഡ്രൈവറും അറസ്റ്റിലായ സലീഷ് നിര്‍മാണ തൊഴിലാളിയുമാണ്. ചാവക്കാട് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.