ന്യൂഡല്‍ഹി: ഭീമ കൊറേഗാവ് കലാപവുമായി ബന്ധപ്പെട്ട് പിടിയിലായ ദലിത് നേതാക്കളെ മാവോയിസ്റ്റുകളായി ചിത്രീകരിക്കരുതെന്ന് റിപബ്ലിക്കന്‍ പാര്‍ട്ടി ഓഫ് ഇന്ത്യ (ആര്‍.പി.ഐ-എ) നേതാവും കേന്ദ്രമന്ത്രിയുമായ രാംദാസ് അത്താവാലേ.
കലാപവുമായി ബന്ധപ്പെട്ട് മേഖലയില്‍ ദലിതുകള്‍ക്കു നേരെ ആക്രമണമഴിച്ചുവിട്ട സംഘ്പരിവാര നേതാവ് സാംഭാജി ഭിഡേയുടെ പങ്കും പൊലിസ് അന്വേഷിക്കണമെന്നും അദ്ദേഹം ആവശ്യപ്പെട്ടു. ഭീമാ- കൊറേഗാവ് കലാപവുമായി ബന്ധപ്പെട്ട് ദലിത് നേതാക്കളുള്‍പ്പെടെ നിരവധി പേരെയാണ് അറസ്റ്റ്‌ചെയ്തിരിക്കുന്നത്. അംബേദ്കര്‍ അനുകൂലികളായവരെ നക്‌സലൈറ്റുകള്‍ എന്ന് വിശേഷിപ്പിക്കുന്നത് ശരിയല്ല. ഇത്തരം നടപടികള്‍ തുടരുകയാണെങ്കില്‍ നിയമനടപടി സ്വീകരിക്കേണ്ടിവരും.
ഇക്കാര്യം മഹാരാഷ്ട്ര മുഖ്യമന്ത്രി ദേവേന്ദ്രഫദ്‌നാവിസുമായി ചര്‍ച്ചചെയ്യും. ഇനിയും അനീതി തുടരുകയാണെങ്കില്‍ ഏതുവിധത്തിലുള്ള സഹായവുംചെയ്യാന്‍ താന്‍ തയാറാണെന്നും അദ്ദേഹം പറഞ്ഞു.