ബ്യൂണസ് അയേഴ്‌സ്: ലോകകപ്പിനൊരുങ്ങുന്ന അര്‍ജന്റീനയ്ക്ക് വീണ്ടും തിരിച്ചടി. മധ്യനിര താരം മാനുവല്‍ ലാന്‍സിനിക്ക് ലോകകപ്പ് നഷ്ടമാകും.
ലോക പോരാട്ടത്തിനുള്ള പരിശീലനത്തിനിടെ ലാന്‍സിനിയുടെ വലത് കാലിന് പരുക്കേറ്റതോടെ താരം ടീമില്‍ നിന്ന് പുറത്തായി. അര്‍ജന്റീന ഫുട്‌ബോള്‍ ഫെഡറേഷന്‍ ഔദ്യോഗിക ട്വിറ്റര്‍ പേജിലൂടെ താരത്തിന് ലോകകപ്പ് നഷ്ടമാകുമെന്ന് സ്ഥിരീകരിച്ചിട്ടുണ്ട്. ലാന്‍സിനി പുറത്തായതോടെ പകരം ആരെ ടീമിലെടുക്കുമെന്ന് വ്യക്തമായിട്ടില്ല. അതേസമയം ഇന്റര്‍ മിലാന്‍ മുന്നേറ്റ താരം ഇക്കാര്‍ഡിക്ക് നേരിയ സാധ്യതകളുണ്ടെന്ന വിലയിരുത്തലുകള്‍ പുറത്ത് വരുന്നുണ്ട്.