സമൂഹവ്യാപനം ചെറുക്കാന്‍ ഗുളിക വിതരണം
മുംബൈ: ഏഷ്യയിലെ ഏറ്റവും വലിയ ചേരികളിലൊന്നായ ധാരാവിയിലെ ആയിരക്കണക്കിന് പേരുടെ ജീവന്‍ കൊവിഡ് മഹാമാരിയില്‍ നിന്ന് രക്ഷിക്കാന്‍ 'ട്രംപിന്റെ അത്ഭുതമരുന്ന്' വിതരണം ചെയ്യാനൊരുങ്ങി മഹാരാഷ്ട്ര സര്‍ക്കാര്‍.
യു.എസ് പ്രസിഡന്റ് ഡോണള്‍ഡ് ട്രംപ് ഉള്‍പ്പെടെയുള്ളവര്‍ കൊവിഡ് -19 രോഗബാധ ചെറുക്കുമെന്ന് അവകാശപ്പെടുന്ന ഹൈഡ്രോക്‌സി ക്ലോറോക്വിന്‍ ഗുളികകളാണ് പ്രതിരോധ മരുന്നെന്ന നിലയില്‍ പൊതുജനങ്ങള്‍ക്ക് നല്‍കുക. ധാരാവി ഉള്‍പ്പെടെയുള്ള പ്രദേശങ്ങളില്‍ സമൂഹവ്യാപനം ചെറുക്കുന്നത് കൊറോണ വൈറസിനെതിരായ പോരാട്ടത്തില്‍ നിര്‍ണായകമാണെന്നാണ് സംസ്ഥാന സര്‍ക്കാര്‍ വിലയിരുത്തല്‍. നിലവില്‍ വൈറസ് ബാധ സ്ഥിരീകരിച്ചവരുമായി അടുത്തിടപഴകിയ ഹൈ റിസ്‌ക് പട്ടികയിലുള്ളവര്‍ക്കായിരിക്കും ആദ്യഘട്ടത്തില്‍ മരുന്ന് നല്‍കുക. ആവശ്യമായ അനുമതികള്‍ ലഭിച്ചാല്‍ പ്രദേശത്ത് പൊതുജനങ്ങള്‍ക്ക് മൊത്തത്തിലും ഗുളികകള്‍ കഴിക്കാനായി വിതരണം ചെയ്യും.
മലേറിയ ചികിത്സക്കായി ഉപയോഗിക്കുന്ന ഹൈഡ്രോക്‌സിക്ലോറോക്വിന്‍ കോറോണ വൈറസിനെതിരായ പ്രതിരോധ മരുന്നായി ഉപയോഗിച്ചിട്ടുണ്ട്. വൈറസ് വ്യാപന സാധ്യത ഏറെയുളള ധാരാവി പോലുള്ള മേഖലകളില്‍ ഹൈഡ്രോക്‌സിക്ലോറോക്വിന്‍ ഒരു പ്രതിരോധ മരുന്നായി ഉപയോഗിക്കാന്‍ ആലോചനയുണ്ടെന്ന് മഹാരാഷ്ട്ര ആരോഗ്യമന്ത്രി രാജേഷ് ടോപെ പറഞ്ഞു. എന്നാല്‍ ധാരാവിയിലെ മുഴുവന്‍ പേര്‍ക്കും ഇത് നല്‍കില്ല. 'മരുന്ന് പാഴാക്കി കളയാന്‍ സാധിക്കില്ല. ഹൈ റിസ്‌കില്‍ പെട്ടവര്‍, സര്‍ക്കാര്‍ ക്വാറന്റൈനില്‍ കഴിയുന്നവര്‍, രോഗികളുമായി സമ്പര്‍ക്കത്തില്‍ ഏര്‍പ്പെട്ടവര്‍ എന്നിങ്ങനെ സംഘമായി തിരിച്ചതിന് ശേഷമായിരിക്കും വിതരണം നടത്തുക എന്നും മന്ത്രി പറഞ്ഞു.എത്ര പേര്‍ക്കാണ് മരുന്ന് നല്‍കേണ്ടത് എന്നതു സംബന്ധിച്ച കണക്കെടുപ്പിലാണ് സര്‍ക്കാര്‍. ഇതു സംബന്ധിച്ച് കേന്ദ്ര സര്‍ക്കാരിനും ഐ.സി.എം.ആറിനും മഹാരാഷ്ട്ര സര്‍ക്കാര്‍ ഉടന്‍ നിര്‍ദേശം അയക്കുമെന്നും ദേശീയ കൊവിഡ് ടാസ്‌ക് ഫോഴ്‌സ് സംഘാംഗങ്ങളുമായി ഇക്കാര്യം ചര്‍ച്ച ചെയ്തു കഴിഞ്ഞെന്നും ഈ മാര്‍ഗം ധാരാവിയില്‍ ഫലവത്താവുകയാണെങ്കില്‍ രാജ്യത്തെ മറ്റിടങ്ങളിലും ഉപയോഗിക്കുന്നത് പരിഗണിക്കാമെന്നും ചര്‍ച്ച നടന്നതായി ഇതുമായി ബന്ധപ്പെട്ട കേന്ദ്രങ്ങള്‍ അറിയിച്ചു.