കണ്ണൂര്‍: പാചകവാതക സിലിണ്ടര്‍ പൊട്ടിത്തെറിച്ച് വീടിന്റെ അടുക്കള ഭാഗികമായി കത്തിനശിച്ചു. പള്ളിക്കുന്ന് വായാട്ട് ഭഗവതി ക്ഷേത്രത്തിനു സമീപത്തെ കയ്യങ്കോട്ട് രമേശന്റെ വീട്ടില്‍ ഇന്നലെ ഉച്ചയ്ക്ക് 1.30ഓടെയാണ് സംഭവം. സിലിണ്ടര്‍ മാറ്റുന്നതിനായി എത്തിച്ച സിലിണ്ടറില്‍ നിന്ന് ഗ്യാസ് ചോര്‍ന്നതാണ് അപകടത്തിനു കാരണമായത്. സ്റ്റോര്‍ റൂമിനു സമീപം സൂക്ഷിച്ച സിലിണ്ടറില്‍ നിന്ന് ഗ്യാസ് ചോരുന്നതായി മനസിലാക്കിയ രമേശന്റെ ബന്ധു സിലിണ്ടര്‍ അടുക്ക ഭാഗത്തേക്കു വലിച്ചെറിയുകയായിരുന്നു. ഇതോടെ അടുപ്പില്‍ നിന്നും തീ പടരുകയും സിലിണ്ടര്‍ ഉഗ്ര ശബ്ദത്തോടെ പൊട്ടിത്തെറിക്കുകയുമായിരുന്നു. ഉടന്‍ വാതില്‍ അടച്ചതിനാലാണ് വന്‍ ദുരന്തം ഒഴിവായത്. ശബ്ദം കേട്ടെത്തിയ സമീപവാസികള്‍ വെള്ളം ഒഴിച്ചാണ് തീ അണച്ചത്. വിവരമറിഞ്ഞ് കണ്ണൂരില്‍ നിന്നുള്ള ഫയര്‍ഫോഴ്‌സും സ്ഥലത്തെത്തി.