റിയാദ്: കൊവിഡ്-19 പ്രതിസന്ധി പശ്ചാതലത്തില്‍ പ്രവാസികളുടെ പ്രശ്‌നങ്ങളില്‍ ഇടപെടലുമായി ഇന്ത്യന്‍ എംബസി. ഇതിന്ടെ ഭാഗമായി രാജ്യത്തെ വിവിധ പ്രവിശ്യകളില്‍ പ്രവര്‍ത്തിക്കുന്ന സാമൂഹ്യ പ്രവര്‍ത്തകരുമായി ഇന്ത്യന്‍ സ്ഥാനപതി ഡോ: ഔസാഫ് സഈദുമായി വീഡിയോ കൂടിക്കാഴ്ച്ച നടത്തി. ഇന്ത്യൻ എംബസി സേവനങ്ങൾ എങ്ങിനെ കാര്യക്ഷമമാക്കാം എന്നതിനെ കുറിച്ചായിരുന്നു പ്രധാന ചർച്ചകൾ. സഊദി അറേബ്യയുടെ വിവിധ ഭാഗങ്ങളിൽ നിന്നുള്ള ഇരുപതോളം സാമൂഹിക പ്രവർത്തകരുമായാണ് അംബാസിഡർ കൂടിക്കാഴ്ച്ച നടത്തിയത്. ഇന്ത്യക്കാരായ സഊദി പ്രവാസികളില്‍ പലരും പലതരം പ്രയാസങ്ങൾ അനുഭവിക്കുന്നത് കാരണം നാട്ടിലേക്ക് മടങ്ങാനായി കാത്തിരിക്കുന്നുണ്ട്. ഗർഭിണികൾ ഹൃദ്രോഗികൾ മറ്റ് ഗുരുതരമായ രോഗം പിടിപെട്ടവർ, വൃദ്ധരായവർ, മാനസിക പ്രശ്നമുള്ളവർ, സന്ദർശന വിസയിൽ വന്നവർ, ഉംറ വിസയിൽ വന്നവർ, ജോലി നഷ്ടപ്പെട്ടവർ, ഫൈനൽ എക്സിറ്റ് കിട്ടിയവർ തുടങ്ങി മാനുഷിക പരിഗണനയുള്ള ഇത്തരം വിഷയങ്ങളില്‍ എംബസി ഉടനടി ഇടപെടണമെന്ന് ചർച്ചയിൽ ആവശ്യമുയർന്നു.

     വരുമാന മാർഗം നഷ്ട്ടപ്പെട്ടതിനാലും നിലവിലെ കർഫ്യു കാരണവും ഭക്ഷണത്തിനും മറ്റു ആവശ്യങ്ങൾക്കും പ്രയാസപ്പെടുന്നവർക്ക് കമ്മ്യൂണിറ്റി വെൽഫെയർ ഫണ്ടിൽ നിന്ന് അടിയന്തര ആവശ്യമായ സംവിധാനങ്ങൾ ഒരുക്കണമെന്നുള്ള നിർദ്ദേശം മുന്നോട്ട് വെച്ചിട്ടുണ്ട്. ആംബുലൻസ് സൗകര്യത്തോടുകൂടിയുള്ള ഒരു മെഡിക്കൽ സംഘത്തിന് രൂപീകരണം കൊടുക്കുക, കമ്മ്യൂണിറ്റി വോളന്റിയർമാർക്ക് മുൻകൂർ പരിശീലനവും പാസും നൽകുക, ഇന്ത്യൻ സ്കൂളുകളിലെ ഫീസിന്റെ കാര്യത്തിൽ ഉചിതമായ ഇടപെടൽ ഉണ്ടാകുക തുടങ്ങിയ വിഷയങ്ങളും അംബാസിഡറുടെ ശ്രദ്ധയിൽ പെടുത്തി.
ഉന്നയിക്കപ്പെട്ട മുഴുവൻ നിർദ്ദേശങ്ങളിലും ആവശ്യമായ തീരുമാങ്ങൾ ഉടനെ അറിയിക്കുമെന്നും വാർത്താ സമ്മേളനം നടത്തി വിവരങ്ങൾ കൂടുത വ്യക്തമാകുമെന്നും അംബാസിഡർ വ്യക്തമാക്കി.

     അംബാസഡർ ഡോ: ഔസാഫ് സഈദ് വിളിച്ച് ചേർത്ത മീറ്റിങ്ങിൽ മലയാളി സമൂഹത്തിൽ നിന്ന് ശിഹാബ് കൊട്ടുകാട്, നിഅമത്തുല്ല, സിദ്ദീഖ് തുവ്വൂർ, കെ ടി എ മുനീർ, വി കെ റഊഫ്, അഹ്മദ് പാളയാട്ട്, സലാഹ് കാരാടൻ, മഞ്ജു മണിക്കുട്ടൻ, നാസ് വക്കം, ജയൻ തച്ചമ്പാറ, രഞ്‌ജിത്‌ എസ് ആർ, ടി എം എ റഊഫ്, സുനീർ, അസ്‌ലം തുടങ്ങിയവർ പങ്കെടുത്തു. കൂടാതെ, ഇന്ത്യയിലെ വിവിധ സംസ്ഥാനങ്ങളിലെ പ്രതിനിധികളും പങ്കെടുത്തു.