അഞ്ചല്‍: പ്രീ - പ്രൈമറി ക്ലാസ് മുറിയില്‍ ഉറങ്ങിക്കിടന്ന കുട്ടിയെ ശ്രദ്ധിക്കാതെ സ്‌കൂള്‍ പൂട്ടിപ്പോയ സംഭവത്തില്‍ ഹെഡ്മിസ്ട്രസിനോട് അഞ്ചല്‍ ഏ.ഇ.ഒ പി. ദിലീപ് വിശദീകരണം തേടി.
അലയമണ്‍ ഗവ.എല്‍.പി സ്‌കൂളില്‍ പി.ടി.എയുടെ ഉത്തരവാദിത്വത്തില്‍ നടന്നുവരുന്ന പ്രീ-പ്രൈമറി ക്ലാസില്‍ പഠിക്കുന്ന മൂന്നര വയസുകാരനായ ശിവ മൗലിയാണ് ക്ലാസ് മുറിയില്‍ ഉറങ്ങിക്കിടന്നത്. ഇതറിയാതെ അധ്യാപികമാര്‍ മറ്റ് കൂട്ടികളെ സ്‌കൂള്‍ വാഹനത്തില്‍ കയറ്റി വിട്ട ശേഷം സ്‌കൂള്‍ പൂട്ടി.
വീട്ടിന് മുന്നില്‍ കുട്ടിയെ കാത്ത് നിന്ന മാതാവാണ് കുട്ടി വാഹനത്തിലില്ലെന്ന് മനസിലാക്കിയത്. കുട്ടി വാഹനത്തില്‍ കയറിയിട്ടില്ലെന്നുള്ള വിവരം ഡ്രൈവര്‍ക്കും അറിയില്ലായിരുന്നു.
രക്ഷാകര്‍ത്താക്കളും നാട്ടുകാരും പൊലിസും നടത്തിയ അന്വേഷണത്തിന്റെ ഭാഗമായി സ്‌കൂളില്‍ നടത്തിയ തെരച്ചിലിലാണ് കുട്ടി ക്ലാസ് മുറിയില്‍ കിടന്നുറങ്ങുന്നത് കണ്ടത്.
ഈ സംഭവത്തിലാണ് ഏ.ഇ.ഒ സ്‌കൂള്‍ പി.ടി.എ സെക്രട്ടറി കൂടിയായ ഹെഡ്മിസ്ട്രസിനോട് വിശദീകരണം ആവശ്യപ്പെട്ടത്.അഞ്ചല്‍ പൊലിസും സ്വമേധയാ കേസെടുത്തിട്ടുണ്ട്.