കാസര്‍കോട്: റെയില്‍വേ സ്റ്റേഷന്‍ തെരുവു നായ്ക്കളുടെ താവളമാകുന്നു. അലഞ്ഞുതിരിയുന്ന തെരുവുനായ്ക്കളുടെ കൂട്ടം യാത്രക്കാര്‍ക്ക് ഭീഷണിയാവുകയാണ്. ട്രെയിന്‍ കാത്തിരിക്കുന്നവരെ നായകള്‍ അക്രമിക്കുന്ന സംഭവം പതിവാണ്. കഴിഞ്ഞ ദിവസം ട്രെയിനില്‍ കയറാനായി ഓടുകയായിരുന്ന യാത്രക്കാരനെ പിന്നാലെ വന്ന നായ അക്രമിച്ചിരുന്നു. യാത്രക്കാരുടെ ഇരിപ്പിടത്തിലും മറ്റുമാണു നായ്ക്കള്‍ രാത്രിയിലും പകലും തങ്ങുന്നത്. മഴക്കാലമായതോടെ റെയില്‍വേ സ്റ്റേഷന്‍ പ്രധാന താവളമാക്കിയിരിക്കുകയാണ് നായ്ക്കൂട്ടങ്ങള്‍. റെയില്‍വേ സ്റ്റേഷന്റെ ചില ഭാഗങ്ങളില്‍ തള്ളുന്ന ഭക്ഷണാവശിഷ്ടങ്ങള്‍ തിന്നുന്നതിനായി തമ്പടിക്കുന്ന നായകളാണ് വലിയ ഭീഷണിയാവുന്നത്.