ന്യൂഡല്‍ഹി: ഭീമ കൊരേഗാവ് കേസില്‍ മനുഷ്യാവകാശ പ്രവര്‍ത്തകന്‍ ഗൗതം നവ്‌ലാഖ എന്‍.ഐ.എ മുന്‍പാകെ കീഴടങ്ങി. 2018 ജനുവരി ഒന്നിനു നടന്ന ഭീമ കൊരേഗാവ് കലാപത്തില്‍ ഉള്‍പ്പെട്ടിട്ടുണ്ടെന്ന് ആരോപണമുള്ള ഇദ്ദേഹത്തിനെതിരേ യു.എ.പി.എ ചുമത്തിയിരുന്നു. കൊവിഡ് പ്രമാണിച്ച് കീഴടങ്ങുന്നതിന് കൂടുതല്‍ സമയം നല്‍കണമെന്ന അപേക്ഷ സുപ്രിം കോടതി തള്ളിയതോടെയാണിത്. മൂന്നാഴ്ചയ്ക്കകം കീഴടങ്ങണമെന്ന് മാര്‍ച്ച് 16ന് സുപ്രിം കോടതി നവ്‌ലാഖയോട് നിര്‍ദേശിച്ചിരുന്നു. നേരത്തെ മാവോയിസ്റ്റ് ബന്ധം ചുമത്തി അറസ്റ്റ് ചെയ്യപ്പെട്ട മുംബൈ ആസ്ഥാനമായ എക്‌ണോമിക് ആന്റ് പൊളിറ്റിക്കല്‍ വീക്കിലി എഡിറ്ററായ  നവ്‌ലാഖയെ ബോംബെ ഹൈക്കോടതിയും സുപ്രിം കോടതിയും ജാമ്യം നല്‍കിയതിനെ തുടര്‍ന്നാണ് വിട്ടയച്ചത്.  ബുദ്ധിജീവിയും ആക്ടിവിസ്റ്റുമായ ആനദ് ടെല്‍തുംദെയും കഴിഞ്ഞ ദിവസം എന്‍.ഐ.എ മുന്‍പാകെ കീഴടങ്ങിയിരുന്നു.