പുനലൂര്‍(കൊല്ലം): ആശുപത്രിയില്‍ പോകുന്ന വാഹനങ്ങളെ തടയില്ലെന്ന മുഖ്യമന്ത്രിയുടെയും ഡി.ജി.പിയുടെയും നിര്‍ദേശങ്ങള്‍ക്ക് പുല്ലുവില കല്‍പ്പിച്ച് പൊലിസിന്റെ ക്രൂരത. ഒരിറ്റു കരുണ മനസിലില്ലാത്ത പൊലിസിന്റെ നടപടിക്ക് ഇരയായതാകട്ടെ രോഗിയായ എണ്‍പതുകാരനും മകനും.

താലൂക്ക് ആശുപത്രിയില്‍നിന്നു ഡിസ്ചാര്‍ജ് ചെയ്ത കുളത്തൂപ്പുഴ സ്വദേശി ഐപ്പ് ജോര്‍ജിനെയാ(80)ണ് ഓട്ടോറിക്ഷാ ഡ്രൈവറായ മകന്‍ റോയിമോന്‍ ചുമലിലേറ്റി ഒരു കിലോമീറ്ററോളം പൊരിവെയിലത്ത് നടന്നത്. നഗരത്തില്‍ ഇന്നലെ ഉച്ചയ്ക്കായിരുന്നു സംഭവം. 

നാലുദിവസം മുമ്പാണ് ജോര്‍ജിനെ ശാരീരികാസ്വാസ്ഥ്യംമൂലം ആശുപത്രിയില്‍ പ്രവേശിപ്പിച്ചത്. രോഗം ഭേദമായി ഇന്നലെ ഉച്ചയ്ക്ക് ഡിസ്ചാര്‍ജ് ചെയ്തതോടെ വീട്ടിലേക്ക് സ്വന്തം ഓട്ടോറിക്ഷയില്‍ കൊണ്ടു പോകാനെത്തിയതായിരുന്നു മകന്‍. ആദ്യം കുളത്തൂപ്പുഴ പൊലിസിനെ സമീപിച്ചെങ്കിലും പിതാവിനെ കൊണ്ടുവരാന്‍ പ്രത്യേകം അനുമതിപത്രം വേണ്ടെന്ന് അറിയിച്ചു. 

ഇതനുസരിച്ച് പുനലൂരേക്ക് യാത്ര തിരിച്ച റോയിയെ രാവിലെ പതിനൊന്നോടെ ടി.ബി ജംഗ്ഷനില്‍ പൊലിസ് തടഞ്ഞു. ആശുപത്രിയിലേക്ക് അനുമതി നിഷേധിച്ചു. നടന്ന് ആശുപത്രിയിലെത്തിയ റോയി പിതാവിനെ തോളിലേറ്റി മാതാവിനൊപ്പം ഓട്ടോറിയ്ക്ക് അടുത്തെത്തിയെങ്കിലും പൊലിസ് കണ്ടതായി ഭാവിച്ചില്ല. 

നഗരത്തില്‍ ഇന്നലെ രൂക്ഷമായ ഗതാഗതക്കുരുക്കുണ്ടായെന്നും രേഖകളില്ലാത്തതിനാലാണ് ഓട്ടോറിക്ഷ കടത്തിവിടാതിരുന്നതെന്നുമാണ് പൊലിസ് പറയുന്നത്.