ബദിയഡുക്ക(കാസര്‍കോട്): നെല്ലിക്കട്ടയില്‍ ഒരേ കുടുംബത്തിലെ മൂന്നു കുട്ടികള്‍ക്ക് തീപൊള്ളലേറ്റു. രണ്ടുപേരുടെ നില ഗുരുതരം. ആദൂര്‍ സ്വദേശിയും നെല്ലിക്കട്ട ആമൂസ് നഗറില്‍ താമസക്കാരനുമായ താജുദ്ദീന്‍ നിസാമിയുടെ മക്കളായ മുഹമ്മദ് അഷീര്‍(13), അബ്ദുല്ല (9), ഫാത്തിമ(7) എന്നിവര്‍ക്കാണ് തീ പൊള്ളലേറ്റത്.

മൂന്നുപേരും കളിക്കാനാണെന്ന് പറഞ്ഞ് വീട്ടില്‍ നിന്നും പുറത്ത് പോയതായി വീട്ടുകാര്‍ പറയുന്നു. അല്‍പ്പ സമയത്തിന് ശേഷം വീടിന് സമീപത്ത് പണി പൂര്‍ത്തിയാവാത്ത മഴവെള്ള സംഭരണിയില്‍ കൂട്ടിയിട്ടിരുന്ന പുല്ലില്‍ നിന്നും തീ പടരുന്നത് ശ്രദ്ധയില്‍ പെട്ടതോടെ ഇത് അണയ്ക്കാന്‍ ചെന്നപ്പോഴാണ് മൂന്നു പേരേയും മഴ സംഭരണിയില്‍ വീണു കിടക്കുന്നത് കണ്ടത്. വീട്ടുകാരുടെ നിലവിളികേട്ട് ഓടിയെത്തിയ നാട്ടുകാര്‍ കുട്ടികളെ പുറത്തെടുത്ത ചെങ്കളയിലെ സ്വകാര്യ ആശുപത്രിയില്‍ കൊണ്ടുപോയേങ്കിലും നില ഗുരുതരമായതിനെ തുടര്‍ന്ന് പരിയാരം സര്‍ക്കാര്‍ മെഡിക്കല്‍ കോളജിലേക്ക് മാറ്റി. തീ പൊള്ളലേറ്റ മൂന്ന് പേരില്‍ അബ്ദുല്ലയും, ഫാത്തിമയുമാണ് ഗുരുതര നിലയിലുള്ളത്.