തിരുവനന്തപുരം: ഇനി മുതല്‍ ദിവസേന വാര്‍ത്താസമ്മേളനമുണ്ടാവില്ലെന്നറിയിച്ച് മുഖ്യമന്ത്രി പിണറായി വിജയന്‍. കൊവിഡുമായി ബന്ധപ്പെട്ട വിവരങ്ങളും ലോക്ക്ഡൗണ്‍ ഇളവുകളും അറിയിച്ചുള്ള ഇന്നത്തെ വാര്‍ത്താസമ്മേളനത്തിനൊടുവിലാണ് മുഖ്യമന്ത്രിയുടെ പ്രഖ്യാപനം.

സാധാരണ മുഖ്യമന്ത്രിയുടെ വാര്‍ത്താക്കുറിപ്പ് വായന 45 മിനിറ്റില്‍ കൂടാറില്ല. എന്നാല്‍ ഇന്നത് ആറു മണിക്ക് തുടങ്ങി ഏഴു മണി വരെ നീണ്ടു. തുടര്‍ന്ന് മാധ്യമപ്രവര്‍ത്തകര്‍ക്ക് കുറഞ്ഞ ചോദ്യങ്ങള്‍ മാത്രമേ ഉന്നയിക്കാനായിട്ടുള്ളൂ. ഇതിനൊടുവിലാണ് മുഖ്യമന്ത്രി ഇക്കാര്യം വ്യക്തമാക്കിയത്.

ഇന്നലെ മുഖ്യമന്ത്രി നടത്തിയ വാര്‍ത്താസമ്മേളനത്തില്‍ കെ.എം ഷാജി എം.എല്‍.എയ്‌ക്കെതിരെ വിമര്‍ശനമുന്നയിച്ചിരുന്നു. ഷാജിയുടെ ഫെയ്‌സ്ബുക്ക് പോസ്റ്റിനെ പരാമര്‍ശിച്ചായിരുന്നു മുഖ്യമന്ത്രിയുടെ വിമര്‍ശനം. ഇതിനു മറുപടിയായി ഇന്ന് കെ.എം ഷാജി വാര്‍ത്താസമ്മേളനം വിളിക്കുകയും മുഖ്യമന്ത്രിക്കെതിരെ രൂക്ഷ വിമര്‍ശനം ചൊരിയുകയുമുണ്ടായി.

ഇന്നലെ ഷാജിയെ വിമര്‍ശിച്ച്, ഈയവസരത്തില്‍ രാഷ്ട്രീയം പറയാന്‍ മുഖ്യമന്ത്രി പ്രതിപക്ഷത്തിന് അവസരം കൊടുത്തുവെന്നാണ് ഇടത് നിരീക്ഷകര്‍ വിലയിരുത്തുന്നത്. ഇത്തരമൊരു പ്രസ്താവന വേണ്ടിയിരുന്നില്ലെന്നും പ്രതിപക്ഷത്തിന് തുറന്ന രാഷ്ട്രീയം പറയാന്‍ അവസരം ലഭിച്ചിരുന്നുവെന്നുമാണ് വിലയിരുത്തല്‍.