കോഴിക്കോട്: ഫേസ്ബുക്ക് പോസ്റ്റിന്റെ പേരില്‍ തന്നെ വിമര്‍ശിച്ച മുഖ്യമന്ത്രി പിണറായി വിജയനെതിരേ ആഞ്ഞടിച്ച് കെ.എം ഷാജി എം.എല്‍എ. ദുരിതാശ്വാസ നിധിയിലേക്കു കൊടുത്ത പണത്തിന്റെ കണക്കു ചോദിക്കാന്‍ എല്ലാവര്‍ക്കും അവകാശമുണ്ടെന്ന് ഷാജി വാര്‍ത്താസമ്മേളനത്തില്‍ പറഞ്ഞു.

കണക്കു ചോദിക്കാതിരിക്കാന്‍ ഇത് കമ്യൂണിസ്റ്റ് രാജ്യമല്ല; ജനാധിപത്യ രാജ്യമാണ്. പണം കൊടുത്തിട്ടുണ്ടെങ്കില്‍ അതു ചോദിക്കാനും അവകാശമുണ്ട്. സ്പ്രിംഗ്ലര്‍ വിവാദമാണ് മുഖ്യമന്ത്രിയുടെ പ്രകോപനത്തിനു കാരണം. തനിക്കു വികൃത മനസാണെന്നാണ് പിണറായി പറയുന്നത്. അതു ജനങ്ങള്‍ തീരുമാനിക്കട്ടെ. പിണറായി വിജയന്‍ മഴുവെറിഞ്ഞ് ഉണ്ടാക്കിയതല്ല കേരളം. നീണ്ട  രാഷ്ട്രീയപ്രക്രിയയുടെ ഭാഗമായാണ് കേരളമുണ്ടായത്. പിണറായിയുടെ പഴയ മുഖം ആരും മറന്നിട്ടില്ല.

മുസ്‌ലിം ലീഗ് സഹായിച്ചിട്ടുണ്ടെന്ന് മുഖ്യമന്ത്രി തന്നെ പറഞ്ഞു. പിന്നെ കണക്കു ചോദിക്കുന്നതില്‍ എന്താണ് പ്രശ്‌നം? തനിക്ക് എം.എല്‍.എയുടെ ശമ്പളം തടയപ്പെട്ടിട്ടും സ്വന്തം കൈയില്‍ നിന്നെടുത്താണ് അതിനു തുല്യമായ പണം മുഖ്യമന്ത്രിയുടെ ദുരിതാശ്വാസ നിധിയിലേക്കു നല്‍കിയത്. ഇത് നേര്‍ച്ചപ്പെട്ടിയില്‍ ഇടുന്ന പണമല്ല.

രണ്ടു കോടി രൂപയാണ് ഷുക്കൂറിന്റെയും ഷുഹൈബിന്റെയും കൊലയാളികളെ രക്ഷിക്കാനായി കേസ് വാദിക്കാന്‍ അഡ്വ. രജിത് കുമാറിനു നല്‍കിയത്. ഒരു മണിക്കൂറിന് 25 ലക്ഷം രൂപ ഫീസുള്ള വക്കീലാണ് രജിത് കുമാര്‍. ഇതിന്റെ ഔദ്യോഗിക രേഖ കൈയിലുണ്ട്. അത് ദുരിതാശ്വാസ ഫണ്ടില്‍ നിന്നല്ലെന്നാണ് മുഖ്യമന്ത്രി പറയുന്നത്. എങ്കില്‍ പിന്നെ എവിടുന്നാണ് ആ പണം കൊടുത്തതെന്ന് മുഖ്യമന്ത്രി വ്യക്തമാക്കണം.

ഷുക്കൂറിന്റെ ഉമ്മ മകന്റെ മയ്യിത്ത് പുതപ്പിക്കാന്‍ വാങ്ങിയ കഫന്‍ പുടവയുടെ നികുതിയുമുണ്ട് ആ പണത്തില്‍. ശരത് ലാലിന്റെയും കൃപേഷിന്റെയും സംസ്‌കാര ചടങ്ങുകള്‍ നടത്താന്‍ വാങ്ങിയ ചന്ദനത്തിരിയുടെയും എണ്ണയുടെയും നികുതിപ്പണവുമുണ്ട്. ആ പണമെടുത്താണോ കൊലയാളികള്‍ക്കു വേണ്ടി വാദിച്ച വക്കീലിനു കൊടുക്കേണ്ടതെന്നും ഷാജി ചോദിച്ചു. പ്രതിപക്ഷ ഉപനേതാവ് ഡോ. എം.കെ മുനീറും വാര്‍ത്താസമ്മേളനത്തില്‍ സംബന്ധിച്ചു.