കൊല്ലങ്കോട്: ഇരുചക്രവാഹനം ഓടിക്കുന്നവര്‍ ശ്രദ്ധിച്ചോളൂ, നിങ്ങള്‍ മദ്യപിച്ചാണ് വാഹനം ഓടിക്കുന്നതെങ്കില്‍ കൊല്ലങ്കോട് പൊലിസ് പിടികൂടിയാല്‍ ബോധവത്കരണ ക്ലാസില്‍ പങ്കെടുത്താല്‍ മാത്രമേ പിന്നിട് വാഹനം തിരികെ ലഭിക്കൂ. കൊല്ലങ്കോട് സി.ഐ സലീഷിന്റെ നേതൃത്വത്തില്‍ മദ്യപാനത്തിലൂടെ ഉണ്ടാകുന്ന വാഹന അപകടത്തെ കുറിച്ചുള്ള ബോധവത്കരണ ക്ലാസുമായാണ് പുതിയ ദൗത്യം ഏറ്റെടുത്തിരിക്കുന്നത്. പരിശോധനയില്‍ മദ്യപിച്ചാണ് വാഹനം ഓടിക്കുന്നതായി തെളിഞ്ഞാല്‍ കേസെടുത്ത് വാഹനം സ്റ്റേഷനില്‍ സൂക്ഷിക്കും. എല്ലാ ശനിയാഴ്ച വൈകുന്നേരം ഒരു മണിക്കൂര്‍ വൈകുന്നേരം ബോധവത്കരണ ക്ലാസിനുശേഷമേ വാഹനം തിരികെ നല്‍കൂ. ഇത്തരത്തിലുള്ള ആദ്യ ക്ലാസ് ശനിയാഴ്ച നടന്നു. സി.ഐ സലീഷ്, എസ്.ഐ വേണുഗോപാല്‍, സി.പി.ഒ ഹക്കീം മുത്തു എന്നിവര്‍ ബോധവല്‍കരണ ക്ലാസെടുത്തു.