വിഴിഞ്ഞം: വിഴിഞ്ഞം മേഖലയെ ഇളക്കിമറിച്ച് വീശിയടിച്ച ശക്തമായ കൊടുംകാറ്റില്‍ നിരവധി മരങ്ങള്‍ കടപുഴകി. ഗതാഗത തടസം സൃഷ്ടിച്ച് കടപുഴകി വീണ മരങ്ങള്‍ വെട്ടിമാറ്റാനുള്ള സൗകര്യം പോലുമില്ലാതെ വിഴിഞ്ഞം ഫയര്‍ഫോഴ്‌സ് വട്ടം കറങ്ങി.
മരങ്ങള്‍ വീണ് വൈദ്യുത ലൈനുകള്‍ പൊട്ടിത്തകര്‍ന്നതോടെ തീരദേശം ഇരുട്ടിലായി. ഇലവന്‍ കെ.വി ലൈനില്‍ പതിച്ച കൂറ്റന്‍ മരംമുറിച്ച് മാറ്റാന്‍ അധികൃതര്‍ വൈകിയതില്‍ പ്രതിഷേധിച്ച് വിഴിഞ്ഞം തെന്നൂര്‍ക്കോണത്ത് ജനങ്ങള്‍ രാത്രിയോടെ പ്രതിഷേധവുമായി രംഗത്തെത്തിയതോടെ പ്രശ്‌ന പരിഹാരത്തിനായി തഹസില്‍ദാര്‍ ഉള്‍പ്പെടെ ഉന്നതാധികൃതരും സ്ഥലത്തെത്തി. ഇന്നലെ വൈകിട്ട് നാലര മുതല്‍ വീശിയടിച്ച കാറ്റ് ജനത്തെ ഏറെ നേരം ഭീതിയിലാഴ്ത്തി.
റോഡിന് കുറുകെ മരങ്ങള്‍ വീണതോടെ പല റൂട്ടുകളിലും ഗതാഗതം സ്തംഭിച്ചു. വിഴിഞ്ഞം,ഹാര്‍ബര്‍, പുന്നക്കുളം, ഉച്ചക്കട, പയറ്റുവിള, ചപ്പാത്ത്, അവണാ കുഴി, പൂവാര്‍ ഉള്‍പ്പെടെ മിക്കയിടത്തും മരങ്ങള്‍ കടപുഴകി വീണു. പൂവാര്‍, വിഴിഞ്ഞം എന്നിവിടങ്ങളില്‍ നിന്നും ഫയര്‍ഫോഴ്‌സ് എത്തി പലയിടത്തെയും മരങ്ങള്‍ വെട്ടിമാറ്റിയെങ്കിലും വിഴിഞ്ഞം-കളിയിക്കാവിള തീരദേശ റോഡില്‍ തെന്നൂര്‍ക്കോണത്ത് ഇലക്ട്രിക് ലൈനില്‍ പതിച്ച കൂറ്റന്‍ പുളിവാവ അധികൃതര്‍ക്ക് വട്ടം കറക്കി. 11 കെ.വി ലൈനില്‍ വീണ മരംമുറിക്കാനുള്ള സംവിധാനമില്ലെന്ന് ഫയര്‍ഫോഴ്‌സ് അറിയിച്ചതോടെ ജനം രോഷാകുലരായി.
പ്രശ്‌നം സംഘര്‍ഷത്തിന്റെ വക്കില്‍ എത്തിയതോടെ വിഴിഞ്ഞം പൊലിസ് എത്തി സ്ഥിതിഗതികള്‍ നിയന്ത്രിച്ചു.
ഒരാഴ്ചക്കുള്ളില്‍ രണ്ടാം തവണയാണ് തീരദേശത്തെ ഇളക്കിമറിച്ച് കാറ്റ് വീശുന്നത്. കാറ്റിനൊപ്പം ശക്തമായകടല്‍ക്ഷോഭവുമുണ്ടായെങ്കിലും മുന്നറിയിപ്പുണ്ടായിരുന്നതിനാല്‍ മത്സ്യത്തൊഴി ലാളികള്‍ കടലില്‍ ഇറങ്ങിയിരുന്നില്ല.