പെരിന്തല്‍മണ്ണ: നഗരത്തില്‍ കഴിഞ്ഞമാസം ട്രാഫിക് റെഗുലേറ്ററി കമ്മിറ്റി നടപ്പാക്കിയ ഗതാഗതപരിഷ്‌ക്കരണത്തില്‍ വലഞ്ഞ് യാത്രക്കാര്‍. നഗരസഭാ ഓഫിസിന് മുന്‍വശത്തെ ബസ് ഷെഡ് പൊളിച്ചുമാറ്റിയതോടെ യാത്രക്കാര്‍ ദുരിതത്തിലായിരിക്കുകയാണ്. മഴപെയ്യുന്നതോടെ യാത്രക്കാര്‍ മഴ നനഞ്ഞ് ബസ് കാത്തിരിക്കേണ്ട അവസ്ഥയാണുള്ളത്. ടൗണിലെത്തുന്നവര്‍ കൂടുതലായും ആശ്രയിക്കുന്ന ബസ് സ്റ്റോപ്പാണ് നഗരസഭാ പരിസരത്തുള്ളത്. കഴിഞ്ഞ മാസം 20 മുതല്‍ ആരംഭിച്ച അവസാനഘട്ട പരിഷ്‌കരണത്തിന്റെ ഭാഗമായാണ് ഇവിടത്തെ സ്റ്റോപ്പ് നിര്‍ത്തലാക്കാനൊരുങ്ങിയതും ബസ് ഷെഡ് പൊളിച്ച് നീക്കിയതും. പകരം ഈ സ്റ്റോപ്പ് മണ്ണാര്‍ക്കാട് റോഡില്‍ സബ് ജയിലിന് സമീപത്തേക്ക് മാറ്റാനായിരുന്നു തീരുമാനം.
നിര്‍ദിഷ്ട മൂന്നാം ബസ് സ്റ്റാന്‍ഡ് യാഥാര്‍ഥ്യമാക്കാന്‍ നിലവിലെ രണ്ടു സ്റ്റാന്‍ഡുകള്‍ സജീവമാക്കി കോടതിയെ ബാധ്യപ്പെടുത്തേണ്ടതുണ്ടെന്നും ഇതിനായി കൂടുതല്‍ സ്റ്റോപ്പുകള്‍ എടുത്തുകളയണമെന്നുമായിരുന്നു അധികൃതരുടെ വിശദീകരണം. ഇതിന്റെ ഭാഗമായാണ് കോഴിക്കോട് റോഡില്‍ സ്റ്റോപ്പുകള്‍ തന്നെ ഇല്ലാത്തവിധം സംഗീത തിയ്യറ്റര്‍ പരിസരത്തെയും നഗരസഭാ ഓഫിസിന് മുന്‍ വശത്തേയും കാത്തിരിപ്പ് കേന്ദ്രങ്ങള്‍ പൊളിച്ച് നീക്കിയത്.
എന്നാല്‍, പരിഷ്‌ക്കാരം പൂര്‍ണമായും നിലവില്‍ വന്നാല്‍ യാത്രക്കാര്‍ക്ക് ബസ് പിടിക്കാന്‍ തിരക്കേറിയ ട്രാഫിക് ജങ്ഷന്‍ ഉള്‍പ്പടെ മുറിച്ചുകടന്ന് കിലോമീറ്ററുകളോളം നടക്കേണ്ടിവരും. ഇതിനാല്‍ ജനവിരുദ്ധ പരിഷ്‌ക്കാരമെന്ന ആരോപണത്തിലൂടെ പ്രതിഷേധം കടുത്തതോടെ ബന്ധപ്പെട്ട അധികൃതരും ക്രമീകരണത്തില്‍ നിന്ന് പിന്തിരിയുന്ന അവസ്ഥയാണ് പിന്നീടുണ്ടായത്. ഇതോടെ അവസാനഘട്ട പരിഷ്‌ക്കാരം പ്രഖ്യാപനം മാത്രമായ മട്ടാണ് നിലവിലുള്ളത്. ക്രമീകരണം നടപ്പാക്കി രണ്ടാഴ്ച്ചയിലേറെ പിന്നിടുമ്പോഴും ഒഴിവാക്കിയെന്നു പറയുന്ന സ്റ്റോപ്പുകളില്‍ ബസ് സര്‍വിസ് ഇപ്പോഴും തുടരുകയാണ്. എന്നാല്‍, ഈ രണ്ടിടത്തെയും ബസ് ഷെഡുകള്‍ പൊളിച്ചുമാറ്റിയതോടെ യാത്രക്കാര്‍ ഏറെ ദുരിതത്തിലായിരിക്കുകയാണ്. ഇന്നലെയും രാവിലെ മുതല്‍ മഴയെത്തിയതോടെ നഗരസഭാ പരിസരത്ത് മഴ നനഞ്ഞാണ് യാത്രക്കാര്‍ കാത്തിരിപ്പ് തുടര്‍ന്നത്. ക്രമീകരണം താല്‍ക്കാലികമായെങ്കിലും ബന്ധപ്പെട്ടവര്‍ മരവിപ്പിച്ച സാഹചര്യത്തില്‍ പുനര്‍വിചിന്തനം പോലും നടത്താതെ പൊളിച്ചുനീക്കിയ ബസ് ഷെഡുകളും പുനഃസ്ഥാപിക്കണമെന്ന ആവശ്യവും ശക്തമാകുകയാണ്.