മനാമ: മാസപ്പിറവി ദൃശ്യമാവാത്തതിനാല്‍ ഗള്‍ഫ് രാഷ്ട്രങ്ങളിലും ഈദുല്‍ ഫിത്വര്‍ (ചെറിയ പെരുന്നാള്‍ )  ബുധനാഴ്ചയായിരിക്കുമെന്ന് വിവിധ രാഷ്ട്രങ്ങളിലെ ഔഖാഫ്മതകാര്യ വിഭാഗങ്ങള്‍ പ്രഖ്യാപിച്ചു.

തിങ്കളാഴ്ച (റമദാന്‍ 29ന്) ചന്ദ്രമാസപ്പിറവി കാണാത്തതിനാല്‍ റമദാന്‍ 30 പൂര്‍ത്തിയാക്കി ശവ്വാല്‍ ഒന്ന് ബുധനാഴ്ചയായിരിക്കുമെന്ന് സഊദി സുപ്രീം കോടതി പ്രഖ്യാപിക്കുകയായിരുന്നു.

ഇതടിസ്ഥാനത്തിലാണ് ഒമാനൊഴികെയുള്ള മുഴുവന്‍ ഗള്‍ഫ് രാഷ്ട്രങ്ങളിലും ചെറിയ പെരുന്നാള്‍ ബുധനാഴ്ചയായിരിക്കുമെന്ന് ബന്ധപ്പെട്ട മതകാര്യഔഖാഫ് മന്ത്രാലയങ്ങള്‍ അറിയിച്ചത്.

റമദാന്‍ 29ന് മാസപ്പിറവി നിരീക്ഷിക്കാനും വിവരങ്ങള്‍ കൈമാറാനും ജിസിസി രാഷ്ട്രങ്ങളിലെല്ലാം പ്രത്യേക നിരീക്ഷണ സമിതികള്‍ രൂപീകരിച്ചിരുന്നു.

അതേ സമയം ഇതര ഗള്‍ഫ് രാഷ്ട്രങ്ങളെ അപേക്ഷിച്ച് ഒരു ദിവസം വൈകി റമദാന്‍ വൃതമാരംഭിച്ച ഒമാനില്‍ ചൊവ്വാഴ്ച മാസപ്പിറവി ദൃശ്യമായാല്‍ മാത്രമേ ബുധനാഴ്ച ഈദുല്‍ ഫിത്വര്‍ ആയി പ്രഖ്യാപിക്കുകയുള്ളൂ.

മാസപ്പിറവി ദൃശ്യമായില്ലെങ്കില്‍ ഒമാനില്‍ വ്യാഴാഴ്ചയായിരിക്കും ചെറിയ പെരുന്നാള്‍.
ഒമാനൊഴികെയുള്ള ജിസിസി രാഷ്ട്രങ്ങള്‍ക്കു പുറമെ മലേഷ്യ, ജപ്പാന്‍, ഇന്തോനേഷ്യ, തായ്‌ലന്‍ഡ്, ന്യൂസിലാന്റ്, വടക്കേ അമേരിക്ക എന്നിവിടങ്ങളിലും നാളെ റമദാന്‍ 30 പൂര്‍ത്തിയാക്കി ബുധനാഴ്ചയായിരിക്കും ചെറിയ പെരുന്നാള്‍.