കോതമംഗലം: പണമടങ്ങിയ ബാഗ് തിരികെ നല്‍കി മാതൃകയായി യുവാവ്. യുവാവിന്റെ സത്യസന്ധതമൂലം പണമടങ്ങിയ ബാഗ് തിരിച്ചു കിട്ടിയ സന്തോഷത്തില്‍ ഉടമയും. മഴമൂലം കവളങ്ങാടുള്ള കാത്തിരിപ്പ് കേന്ദ്രത്തില്‍ കയറിനിന്ന ബൈക്ക് യാത്രികനായ അള്ളുങ്കല്‍ പ്ലാച്ചേറ്റിയില്‍ ബിബിനു ലഭിച്ചത് പണമടങ്ങിയ ഹാന്‍ഡ് ബാഗാണ്.
തിരക്കില്‍ ജോലിക്ക് പോവുകയായിരുന്നിട്ടും ബാഗും പണവും ഊന്നുകല്‍ പൊലിസ് സ്‌റ്റേഷനില്‍ എത്തിക്കുകയും ഉടമയെ കണ്ടെത്തി നേരിട്ട് ഏല്‍പിച്ച ശേഷമാണ് മടങ്ങിയത്. സമുഹത്തിനു മാതൃക കാണിച്ച ബിബിനെ ഊന്നുകല്‍ പൊലിസ് അഭിനന്ദിച്ചു. ഇത്തരത്തിലുള്ള സല്‍കര്‍മങ്ങളെ അനുമോദിക്കുകയും സമാനമായ സംഭവങ്ങള്‍ ഇനിയും ഉണ്ടായാല്‍ അടുത്തുള്ള പൊലിസ് സ്റ്റേഷനുകളില്‍ അറിയിക്കണമെന്നും ഊന്നുകല്‍ പൊലിസ് അറിയിച്ചു.