തിരുവനന്തപുരം: സ്പ്രിംഗ്‌ളര്‍ വിഷയത്തില്‍ ഐ.ടി വകുപ്പിന് വീഴ്ച്ച സംഭവിച്ചിട്ടില്ലെന്ന് നിയമമന്ത്രി എ.കെ ബാലന്‍. മുഖ്യമന്ത്രിയെ അപമാനിക്കാനാണ് ആരോപണം ഉന്നയിക്കുന്നവര്‍ ശ്രമിക്കുന്നത്. സര്‍ക്കാരിന്റെ മികച്ച പ്രവര്‍ത്തനത്തില്‍ പ്രതിപക്ഷത്തിന് ആശങ്കയുണ്ട്. തെരഞ്ഞെടുപ്പില്‍ പ്രതിഫലിക്കുമോ എന്ന ഭയമാണ് പ്രതിപക്ഷത്തിന്റേതെന്നും മന്ത്രി പറഞ്ഞു.

സ്പ്രിംഗ്‌ളര്‍ കരാര്‍ നല്‍കിയതില്‍ തെറ്റില്ല. കമ്പനി പ്രവര്‍ത്തനത്തിന് പര്യാപ്തമാണോ എന്നതാണ് പ്രധാന പ്രശ്‌നം. കരാര്‍ സംബന്ധിച്ച് നിയമവകുപ്പ് അറിയേണ്ട കാര്യമില്ലെന്നും വിഷയത്തില്‍ നാളെ പ്രശ്‌നം വന്നാല്‍ അതിന് ഉത്തരവാദിത്വം ഐ.ടി വകുപ്പിന് മാത്രമായിരിക്കുമെന്നും അദ്ദേഹം പറഞ്ഞു.

രോഗികളുടെ വിവരങ്ങള്‍ ശേഖരിച്ചത് തദ്ദേശ സ്വയംഭരണ സ്ഥാപനങ്ങളും ആരോഗ്യവകുപ്പ് അധികൃതരുമാണ്. അത് വിശകലനം ചെയ്യാന്‍ സോഫ്റ്റ് വെയര്‍ വേണമെന്ന് തീരുമാനിച്ചത് ഐ.ടി വകുപ്പാണ്. ഐ.ടി വകുപ്പിന്റെ നടപടിയോട് ഒരു വിധത്തിലുമുള്ള വിയോജിപ്പും സര്‍ക്കാരിനില്ലെന്നും മന്ത്രി പറഞ്ഞു.

മുഖ്യമന്ത്രിയെ അപമാനിക്കാനാണ് ആരോപണങ്ങള്‍ ഉന്നയിക്കുന്നവരുടെ ശ്രമം. ലാവലിന്‍ വിഷയവുമായി ബന്ധപ്പെട്ട ആരോപണം വന്ന സമയത്ത് മുഖ്യമന്ത്രിയുടെ ഭാര്യ കമലയ്ക്ക് ഇന്റര്‍നാഷണല്‍ ഹോട്ടല്‍ ഉണ്ട് എന്ന് പറഞ്ഞവരാണ് പ്രതിപക്ഷം. അങ്ങനെ നശിപ്പിച്ച് കളയാന്‍ കഴിയുന്ന ആളാണ് പിണറായി എന്ന് ആരും കരുതേണ്ടതില്ലെന്നും മന്ത്രി ബാലന്‍ പറഞ്ഞു.