കളമശേരി: ഇന്നലെ രാവിലെ വീശിയടിച്ച കാറ്റില്‍ കളമശേരിയില്‍ വീടുകള്‍ക്ക് നാശനഷ്ടം. നഗരസഭ ഒന്നാം വാര്‍ഡിലും ഏഴാം വാര്‍ഡിലും 41ാം വാര്‍ഡിലുമാണ് വീടുകള്‍ തകര്‍ന്നത്. മൂന്ന് അപകടങ്ങളിലും ആളപായമില്ല. ഒന്നാം വാര്‍ഡില്‍ മാവിന്റെ കമ്പ് ഒടിഞ്ഞു വീണ് മാളിയേക്കല്‍ സാജു ആന്റണിയുടെ വീട് ഭാഗികമായി തകര്‍ന്നു.
41ാം വാര്‍ഡില്‍ ഇന്‍ഡസ്ട്രിയല്‍ എസ്റ്റേറ്റ് റോഡില്‍ കപ്പിത്താന്‍ വീട്ടില്‍ സെബാസ്റ്റ്യന്റെ വിട്ടിന്റെ മേല്‍ക്കൂരയിലേക്ക് സമീപത്തുണ്ടായിരുന്ന വലിയ പരുത്തി മരം മറിഞ്ഞ് വീഴുകയായിരുന്നു. വീട്ടുകാര്‍ പള്ളിയില്‍ പോയപ്പോഴായിരുന്നതിനാല്‍ ആളപായമുണ്ടായില്ല. കുട്ടികളുടെ പുസ്തകങ്ങളും മറ്റും മഴയില്‍ നനഞ്ഞ് ഉപയോഗശൂന്യമായി.
ഏഴാം വാര്‍ഡിലെ റോക്ക് വെല്‍ പമ്പ് ഹൗസിന് സമീപം പാറക്കാട്ടില്‍ ഷാജിയുടെ വീടിന്റെ മേല്‍ക്കൂര ശക്തമായ കാറ്റില്‍ തകര്‍ന്ന് വീഴുകയായിരുന്നു. ഇരുമ്പ് തൂണുകളില്‍ നിര്‍മിച്ച ജിഐ ഷീറ്റ് മേല്‍ക്കൂര ശക്തമായ കാറ്റില്‍ വീടിന്റെ മുന്‍ ഭാഗത്തേക്ക് വീഴുകയായിരുന്നു.