റിയാദ്: കൊവിഡ്-19 വ്യാപന പശ്ചാത്തലത്തിൽ വിവിധ രാജ്യങ്ങൾ കർഫ്യു പോലെയുള്ള കർശന നിയന്ത്രണങ്ങൾ കൊണ്ട് വന്നതിനെ പൂർണ്ണമായും അംഗീകരിച്ച് വിശുദ്ധ റമദാൻ വീട്ടിൽ തന്നെ ഒതുക്കണമെന്നു ആഹ്വാനം. സഊദി അറേബ്യയിലെ ഉന്നത പണ്ഡിത സഭയാണ് ലോക മുസ്‌ലിംകളോട് ഇത്തരത്തിലൊരു ആഹ്വാനവുമായി രംഗത്തെത്തിയയത്. വിശ്വാസികൾ തങ്ങളുടെ രാജ്യങ്ങളിലെ അധികാരികൾ പുറപ്പെടുവിക്കുന്ന പ്രസക്തമായ പ്രതിരോധ, മുൻകരുതൽ നടപടികൾ പാലിക്കണമെന്നും . ഇതിനായി അധികാരികൾ വിധികൾ നടപ്പിലാക്കുമ്പോൾ മതപരമായി അത് അനുസരിക്കുകയെന്ന തങ്ങളുടെ കടമകൾ നിർവഹിച്ച് മുസ്‌ലിംകൾ മാതൃക കാണിക്കണണമെന്നും സഭ ആവശ്യപ്പെട്ടതായി സഊദി വാർത്താ ഏജൻസി റിപ്പോർട്ട് ചെയ്‌തു. പ്രാർത്ഥന പോലുള്ള മതപരമായ ആചാരങ്ങളിൽ പങ്കാളികളാകാൻ മുസ്‌ലിംകളോട് പണ്ഡിത സഭ ആവശ്യപ്പെടുമ്പോഴും മറ്റുള്ളവർക്ക് ദോഷം ചെയ്യുന്നതിൽ നിന്ന് വിട്ടുനിൽക്കണമെന്നും ആവശ്യപ്പെട്ടു.

     പൊതുജനാരോഗ്യം സംരക്ഷിക്കുന്നതിനും കൊറോണ വൈറസ് വ്യാപനം പരിമിതപ്പെടുത്തുന്നതിനും ലക്ഷ്യമിട്ടുള്ള നിയമങ്ങൾ മുസ്‌ലിംകൾ അവരുടെ രാജ്യങ്ങളിലോ അവർ താമസിക്കുന്ന രാജ്യങ്ങളിലോ ഉള്ള അധികാരികളുടെ തീരുമാനങ്ങൾക്ക് അനുസൃതമായി പ്രവർത്തിക്കുക, തങ്ങളുടെ രാജ്യങ്ങളിലോ അവർ താമസിക്കുന്ന രാജ്യങ്ങളിലോ അധികാരികൾ ശുപാർശ ചെയ്‌താൽ അവരവരുടെ വീടുകളിൽ വെച്ച് നിർബന്ധിത പ്രാർത്ഥനയും തറാവീഹ് നിസ്‌കാരവും നടത്തുക, ഇഫ്ത്വാർ, അത്താഴ ഭക്ഷണം എന്നിവയുൾപ്പെടെയുള്ള അണുബാധ വ്യാപിക്കുന്നതിനുള്ള പ്രധാന കാരണമായി കരുതുന്ന സമൂഹ സമ്പർക്കം ഒഴിവാക്കുക തുടങ്ങിയ ആവശ്യങ്ങളാണ് പണ്ഡിത സഭ ലോക മുസ്‌ലിംകളുടെ മുന്നിൽ വെച്ചത്.

      വൈറസ് വ്യാപനം തടയുന്നതിന്റെ ഭാഗമായി റമദാനിലെ പ്രത്യേക കൂട്ട പ്രാർത്ഥനകളും പെരുന്നാൾ അടക്കമുള്ള പ്രത്യേക നിസ്‌കാരങ്ങളും വീടുകളിൽ വെച്ച് തന്നെ നിർവ്വഹിക്കണമെന്നു സഊദി ഗ്രാൻഡ് മുഫ്‌തിയും രണ്ടു ദിവസം മുമ്പ് ആവശ്യപ്പെട്ടിരുന്നു.