തളിപ്പറമ്പ്: പഴയങ്ങാടിയിലെ ബസ്റ്റാന്റിന് സമീപത്തെ അല്‍ ഫത്തീബി ജ്വല്ലറിയില്‍ നിന്നും ഒരു കോടി രൂപ വിലമതിക്കുന്ന സ്വര്‍ണ്ണാഭരണങ്ങളും രണ്ട് ലക്ഷം രൂപയും കവര്‍ന്ന സംഘത്തിലെ സൂത്രധാരനെ പൊലിസ് തിരിച്ചറിഞ്ഞതായി സൂചന.
സംഭവത്തിന് പിന്നില്‍ പഴയങ്ങാടി സ്വദേശിയുടെ നേതൃത്വത്തിലുള്ള നാലംഗസംഘമാണെന്ന നിഗമനത്തിലാണ അന്വേക്ഷണം പുരോഗമിക്കുന്നത്.
ഇന്നലെ പൊലസ് പ്രതിയുടെ രേഖ ചിത്രം പുറത്ത് വിട്ടതോടെ പഴയങ്ങാടി മേഖലയിലുള്ള ചിലര്‍ നാട്ടില്‍ നിന്നും കടന്നതായി പൊലിസിന് സൂചന ലഭിച്ചിട്ടുണ്ട്. കവര്‍ച്ചാസംഘം മാടായിപാറയില്‍ മണിക്കൂറുകളോളം ഒത്തുകൂടി അവസാനവട്ട ഒരുക്കം നടത്തിയതിന് ശേഷമാണ് കവര്‍ച്ച നടത്തി രക്ഷപ്പെട്ടത്.
കവര്‍ച്ചാ സംഘം മാടായി പാറയില്‍ ഒത്തുകൂടിയ സ്ഥലത്ത് നിന്നും ചില തെളിവുകള്‍ അന്വേഷണ സംഘത്തിന് ലഭിച്ചിട്ടുണ്ട്. മോഷ്ടാക്കള്‍ വെങ്ങര റെയില്‍വെ ഗേറ്റ് വഴി കടന്ന് സ്വര്‍ണ്ണവുമായി ട്രെയിനില്‍ മംഗലപുരത്തേക്ക് കടന്നതായാണ് സൂചന. കര്‍ണ്ണാടകയിലെ പുത്തൂരില്‍ രണ്ട് വര്‍ഷം മുമ്പ് നടന്ന ഒരു ജ്വല്ലറി കവര്‍ച്ച സമാന സ്വഭാവമുള്ളതായതിനാല്‍ അന്വേഷണസംഘം ഇക്കാര്യവും പരിശോധിക്കുന്നുണ്ട്. മോഷ്ടാക്കള്‍ എത്തിയ വാഹനം കണ്ടെത്താനുള്ള ശ്രമവും ഊര്‍ജ്ജിതമാക്കി. വിവിധ സ്ഥലങ്ങളിലെ പത്തോളം നിരിക്ഷണ ക്യാമറയിലെ ദൃശ്യങ്ങള്‍ ശേഖരിക്കുകയും ചെയ്തിട്ടുണ്ട്.
കവര്‍ച്ച നടന്ന ദിവസത്തെയും അതിന് മുന്‍പും ശേഷവുമുള്ള പതിനാലായിരത്തിലേറെ ഫോണ്‍ കോളുകളും പരിശോധിച്ച് വരികയാണ്.മുട്ടം, എട്ടിക്കുളം ഭാഗങ്ങളിലെ ടവറുകള്‍ വഴി കടന്നുപോയ ഫോണുകളിലെ വിവരങ്ങള്‍ ശേഖരിച്ചിട്ടുണ്ട്. കവര്‍ച്ചക്കാര്‍ ജ്വല്ലറിയിലെ നിരിക്ഷണ ക്യാമറ സ്‌പ്രേ പെയ്ന്റ് അടിച്ച് നശിപ്പിക്കുകയും നിരീക്ഷണ ക്യാമറയുടെ ഡിവിആര്‍ സംവിധാനം കടത്തികൊണ്ട് പോയതും അന്വേഷണത്തിന്റെ ആദ്യ ഘട്ടത്തെ സാരമായി ബാധിച്ചിരുന്നു . ഇതിനിടയില്‍ ഗുഡ്‌സ് ഓട്ടോറിക്ഷ ഡ്രൈവര്‍ നല്‍കിയ മൊഴിയാണ് നിര്‍ണ്ണായകമായത്.ജ്വല്ലറിയില്‍ സാധനങ്ങള്‍ ഇറക്കാന്‍ വന്ന ഇയാള്‍ കടയുടെ മുന്നില്‍ ഒരാള്‍ നില്‍ക്കുന്നത് കണ്ട് അന്വേഷിച്ചപ്പോള്‍ ഷട്ടര്‍ നന്നാക്കുകയാണെന്നും കടയുടമയും ജീവനക്കാരും പള്ളിയില്‍ പോയതാണെന്നും പറഞ്ഞു.
ഡ്രൈവറില്‍ നിന്നും പ്രതി സംസാരിച്ച ഭാഷ ശൈലി മനസ്സിലാക്കിയ അന്വേഷണ സംഘം പഴയങ്ങാടി ഭാഗത്തുള്ള ആളാണ് പ്രതി എന്ന് വിലയിരുത്തുകയും ഓട്ടോറിഷ ഡ്രൈവറുടെ മൊഴിയുടെ അടിസ്ഥാനത്തില്‍ വട്ട മുഖമുള്ള മോഷ്ടാവിന്റെ രേഖാചിത്രം ചിത്രം തയ്യാറാക്കുകയുമായിരുന്നു.അടുത്ത ദിവസങ്ങളില്‍ തന്നെ പ്രതികള്‍ പിടിയിലാവുമെന്നാണ് തളിപ്പറമ്പ് ഡിവൈ.എസ്.പി കെ.വി.വേണുഗോപാലിന്റെ നേതൃത്വത്തിലുള്ള അന്വേഷണസംഘം നല്‍കുന്ന സൂചന.