ബദിയഡുക്ക: നീര്‍ച്ചാല്‍ ടൗണില്‍ മോഷണ പരമ്പര. രണ്ടു സ്ഥലങ്ങളില്‍ കവര്‍ച്ച നടത്തി. മൂന്ന് കടകളില്‍ മോഷണശ്രമം. നീര്‍ച്ചാല്‍ പുതുക്കോളിയിലെ വിഷ്ണു ശര്‍മ്മയുടെ എസ്. വി എന്റര്‍പ്രൈസസ് മൊബൈല്‍ ഷോപ്പ് ഷട്ടറിന്റെ പൂട്ട് പൊളിച്ച് അകത്ത് കടന്ന മോഷ്ടാവ് മേശ വലിപ്പില്‍ സൂക്ഷിച്ചിരുന്ന 15,000 രൂപ കവര്‍ന്നു. തൊട്ടടുത്ത മഹാലിംഗ ഭട്ടിന്റെ ഉടമസ്ഥതയിലുള്ള ശക്തി ട്രേഡേഴ്‌സിന്റെ ഷട്ടറിന്റെ ഒരു പൂട്ട് പൊളിച്ചെങ്കിലും മറ്റൊന്ന് പൊളിക്കാന്‍ കഴിയാത്തതിനാല്‍ കവര്‍ച്ചാ ശ്രമം ഒഴിവായി.
സമീപത്തെ വ്യാപാരി വ്യവസായി ഏകോപന സമിതി പ്രസിഡന്റ് സുബ്രഹ്മണ്യ ഭട്ടിന്റെ ഉടമസ്ഥതയിലുള്ള ഗണേഷ് ബേക്കറിയുടെ പിന്‍ വശത്തെ വാതിലിന്റെ പൂട്ട് പൊളിച്ച് അകത്ത് കടന്ന മോഷ്ടാവ് അലമാര കുത്തി തുറന്നതല്ലാതെ സാധനങ്ങള്‍ ഒന്നും നഷ്ടപ്പെട്ടിട്ടില്ലെന്ന് സുബ്രഹ്മണ്യ ഭട്ട് പറഞ്ഞു. ടൗണില്‍ നിന്ന് നൂറ് മീറ്റര്‍ മാറിയുള്ള ഡോ. മാലതി പ്ലകിന്റെ ക്ലിനിക്കിന്റെ പൂട്ട് പൊളിച്ച് അകത്ത് കടന്ന മോഷ്ടാവ് 2,750 രൂപ കവര്‍ന്നു.
ബേക്കറിക്കുള്ളിലേയും സമീപത്തെ കടയിലേയും സ്ഥാപിച്ച സി.സി കാമറ ദൃശ്യത്തിന്റെ അടിസ്ഥാനത്തില്‍ ഇന്നലെ പുലര്‍ച്ചെ രണ്ടിനും മൂന്നരക്കും മോഷ്ടാവ് എത്തിയതെന്നാണ് സംശയിക്കുന്നത്. മുഖം മൂടി ധരിച്ച മോഷ്ടാവ് കമ്പി പാരകൊണ്ട് പൂട്ട് പൊളിക്കുന്ന ദൃശ്യം കാമറയില്‍ പതിഞ്ഞിട്ടുണ്ട്. ഇത് സംബന്ധിച്ച് വിഷ്ണു ശര്‍മ്മ,സുബ്രഹ്മണ്യ ഭട്ട് ,മഹാലിംഗ ഭട്ട് നല്‍കിയ പരാതിയില്‍ ബദിയഡുക്ക പൊലിസ് കേസെടുത്ത് അന്വേഷണം ആരംഭിച്ചു.