പാലപ്പിള്ളി: കാരികുളത്ത് വീടിനകത്തു ഉറങ്ങിക്കിടന്ന വീട്ടമ്മയെ തെരുവുനായ അക്രമിച്ചു. തോട്ടം തൊഴിലാളി പാഡിയില്‍ താമസിക്കുന്ന പാട്ടുകര മൊയ്തീന്റെ ഭാര്യ സാബിറ (48)യ്ക്കാണ് കടിയേറ്റത്.
കഴിഞ്ഞ ദിവസം ഉച്ചയോടെയായിരുന്നു സംഭവം. ഈ സമയം മൊയ്തീന്‍ വീടിന്റെ തിണ്ണയിലുറങ്ങുന്നുണ്ടായിരുന്നു. അകത്തു കയറിയ നായ സാബിറയുടെ കാലില്‍ കടിക്കുകയായിരുന്നു. തുടര്‍ന്നു കാരികുളം സെന്ററിലെത്തിയ നായ റോഡില്‍ വച്ചു കൊളപ്രം വര്‍ഗീസിന്റെ ഭാര്യ ത്രേസ്യക്കുട്ടി (70) യെയും കടിച്ചു.
പിന്നീടു സമീപത്തെ വളര്‍ത്തുനായയ്ക്കും തെരുവുനായുടെ കടിയേറ്റു. നായുടെ കടിയേറ്റവര്‍ മറ്റത്തൂര്‍ താലൂക്ക് ആശുപത്രിയില്‍ ചികിത്സയിലാണ്. കടിയേറ്റ വളര്‍ത്തുനായ നിരീക്ഷണത്തിലാണ്. നാട്ടുകാര്‍ തല്ലിക്കൊന്ന തെരുവുനായയെ പോസ്റ്റ് മോര്‍ട്ടം നടത്തി.