റിയാദ്: സഊദിയിൽ കൊറോണക്കിടെ അഴിമതി നടത്തിയ കേസിൽ ഉന്നതരടക്കം എട്ടു പേർ പിടിയിൽ. ആരോഗ്യ മന്ത്രാലയത്തിലെ ഉദ്യോഗസ്ഥരടക്കമുള്ള എട്ടംഗ സംഘത്തെയാണ് അറസ്റ്റ് ചെയ്‌തത്‌. വിദേശ രാജ്യങ്ങളിൽ നിന്നെത്തിയ സഊദി പൗരന്മാരെ ക്വാറന്റൈനില്‍ താമസിപ്പിക്കുന്നതിനു ഹോട്ടലിന് കരാർ നൽകണമെന്നാവശ്യപ്പെട്ടു സഊദി ആരോഗ്യ മന്ത്രാലയത്തെ സമീപിക്കുകയും അതിനായി മന്ത്രാലയത്തിലെ രണ്ടു ഉന്നതർ കരുക്കൾ നീക്കുകയും ചെയ്‌തതിനെ തുടർന്നാണ് ഉദ്യോഗസ്ഥരടക്കം എട്ടു പേരെ അറസ്‌റ്റ് ചെയ്‌തത്‌.

     ക്വാറന്റൈനിൽ താമസിപ്പിക്കുന്നതിനായി ടൂറിസം വകുപ്പില്‍ ജോലി ചെയ്യുന്ന ഉയര്‍ന്ന ഉദ്യോഗസ്ഥന്‍ മുഖേനയാണ് ആരോഗ്യ മന്ത്രാലയത്തിലേക്ക് ക്വട്ടേഷന്‍ കൈമാറിയത്. വിദേശത്ത് നിന്നെത്തുന്നവരെ താമസിക്കാന്‍ രാജ്യത്തെ വിവിധ ഹോട്ടലുകളുമായി ആരോഗ്യ മന്ത്രാലയം നേരത്തെ ഒപ്പു വെച്ച കരാറിന്റെ മറവിലാണ് ഇവർ അഴിമതി നീക്കം നടത്തിയത്. ഉയര്‍ന്ന വില രേഖപ്പെടുത്തി ഹോട്ടലുടമ നല്‍കിയ ക്വട്ടേഷന്‍ സ്വീകരിക്കുന്നതിന് ഇവര്‍ കമ്മീഷന്‍ ആവശ്യപ്പെടുകയായിരുന്നു. പ്രതിസന്ധിഘട്ടം തരണം ചെയ്യാന്‍ രാജ്യം കഠിനപ്രയത്‌നം നടത്തുമ്പോള്‍ പൊതുമുതല്‍ ചൂഷണം ചെയ്യാനാണ് ഇവർ ശ്രമിച്ചതെന്ന് അഴിമതി വിരുദ്ധ സമിതി (നസാഹ) അറിയിച്ചു.

      ടൂറിസം മന്ത്രാലയത്തിലെ ഉന്നതനും ഇക്കാര്യത്തിനായി കരുക്കൾ നീക്കിയതായും അധികൃതർ അറിയിച്ചു. അനധികൃത രീതിയിൽ ഹോട്ടൽ ഏറ്റെടുക്കുന്നത് സംബന്ധിച്ച്‌ വിവരം കിട്ടിയതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് അഴിമതി നീക്കം കണ്ടെത്തിയത്.