ജിദ്ദ: ലോകം മുഴുവൻ കോവിഡ് വൈറസിന്റെ ഭീതിയിൽ കഴിയുന്ന സാഹചര്യത്തിൽ പ്രവാസികൾക്ക് നോർക്ക പ്രഖ്യാപിച്ച സർക്കാർ ധനസഹായം പ്രവാസികളെ കബളിപ്പിക്കുന്നതാണെന്ന് റിയാദ് മലപ്പുറം ജില്ല കമ്മിറ്റി ആരോപിച്ചു. അവധിക്ക് നാട്ടിൽ പോയി തിരിച്ചു വരാൻ സാധിക്കാത്ത പ്രവാസികൾക്ക് വേണ്ടി നോർക്ക റൂട്ട്സ് വഴി ഇടത് സർക്കാർ പ്രഖ്യാപിച്ചിട്ടുള്ള ധന സഹായം ലഭിക്കാനുള്ള അപേക്ഷ നൽകുന്നതിനുള്ള സങ്കീർണ്ണതയാണ് പ്രവാസികൾക്ക് സഹായം കിട്ടുന്നതിന് തടസ്സമാവുകയാണ്. നോർക്ക ആവിശ്യപ്പെടുന്ന രേഖകളിൽ രേഖകളിൽ പ്രവാസിയുടെ സേവിങ് ബാങ്ക് അക്കൗണ്ട്, ബാങ്ക് പാസ്ബുക്ക് തുടങ്ങിയവ നൽകാൻ ആവശ്യപെടുന്നു. മിക്ക പ്രവാസികളുടെയും ബാങ്ക്‌ അക്കൗണ്ട്‌ എൻ.ആർ. ഐ അക്കൌണ്ടുകളാണ്. ബാങ്കുകളിൽ പോയി പുതിയ അക്കൗണ്ട് തുടങ്ങുന്നതും പാസ്ബുക്ക് ഉണ്ടാക്കുന്നതും കടുത്ത നിയന്ത്രണങ്ങൾ നിലനിൽക്കുന്ന സാഹചര്യത്തിൽ എളുപ്പം ചെയ്യാവുന്ന ഒന്നല്ല.

കോവിഡ് ധന സഹായത്തിന് ഓൺലൈൻ വഴിയാണ് അപേക്ഷ നൽകേണ്ടതെങ്കിലും അധിക സമയങ്ങളിലും ലിങ്ക് ലഭ്യമല്ല. ഏപ്രിൽ 30 വരെയാണ് അപേക്ഷിക്കാനുള്ള അവസാന തയ്യതിയായി നൽകിയിട്ടുള്ളത്. ഇത്തരം സാഹചര്യം തുടരുകയാണെങ്കിൽ അധിക പ്രവാസികൾക്കും സഹായത്തിന് അപേക്ഷിക്കുവാൻ കഴിയില്ല. മാത്രമല്ല ജനുവരി ഒന്നിന് ശേഷം നാട്ടിൽ പോയ പ്രവാസികളോട് മാത്രമാണ് സഹായത്തിന്‌ അപേക്ഷിക്കാൻ സർക്കാർ നിർദ്ദേശം. നവംബർ, ഡിസംബർ മാസങ്ങളിൽ നാട്ടിൽ പോയ പ്രവാസികൾക്കും വിദേശത്ത് ജോലി നഷ്ടപെട്ട് ദുരിതത്തിൽ കയ്യുന്ന പ്രവാസികൾക്കും ആനുകൂല്യം ലഭ്യമാക്കാൻ സർക്കാറും നോർക്കയും താല്പര്യമെടുക്കണം. പ്രസ്തുത വിഷയങ്ങളിൽ നിലനിൽക്കുന്ന പ്രശ്നങ്ങൾ നീക്കി അപേക്ഷ നടപടികൾ ലഘൂകരിക്കുവാനും പ്രവാസി കുടുംബങ്ങൾക്ക് സഹായം ഉറപ്പ് വരുത്തുവാനും സർക്കാർ തയ്യാറാവണമെന്ന് റിയാദ് മലപ്പുറം ജില്ല കെ.എം.സി.സി കമ്മിറ്റി ആവശ്യപ്പെട്ടു. ഇത് സംബന്ധിച്ച നിവേദനം മുഖ്യമന്ത്രിക്ക് സമർപ്പിക്കുകയും ചെയ്തതായി റിയാദ് മലപ്പുറം ജില്ല കെ.എം.സി.സി പ്രസിഡന്റ്‌ മുഹമ്മദ്‌ വേങ്ങര, ജനറൽ സെക്രട്ടറി അസീസ് വെങ്കിട്ട,കോൺസെന്റർ സമിതി-നോർക്ക ഹെൽപ്പ് ഡസ്ക് കോഡിനേറ്റർമാരായ ഷൗക്കത്ത് കടമ്പോട്ട്, ഷബീറലി ജാസ് എന്നിവർ ആവശ്യപെട്ടു.