രാജാക്കാട്: ഓടിക്കൊണ്ടിരുന്ന സ്‌കൂള്‍ ബസിനു മുകളിലേക്ക് വൈദ്യുതി പ്രവാഹമുള്ള ഇരുമ്പ് കമ്പി പൊട്ടി വീണു. ഡ്രൈവറുടെ സന്ദര്‍ഭോചിതമായ ഇടപെടല്‍ മൂലം വന്‍ അപകടം ഒഴിവായി. എന്‍.ആര്‍.സിറ്റി എസ്.എന്‍.വി ഹയര്‍ സെക്കന്‍ഡറി സ്‌കൂളിലെ ബസിന്റെ  മുകളിലേക്കാണ് വൈദ്യുതി കമ്പി പൊട്ടി വീണത്. ഇന്നലെ രാവിലെ രാജകുമാരി നോര്‍ത്തിനു സമീപമാണ് സംഭവം.
വിദ്യാര്‍ഥികളുമായി സ്‌കൂളിലേക്ക് പോയ ബസിന് മുകളിലേക്ക് സമീപത്തെ വീട്ടിലേക്കുള്ള സര്‍വീസ് കേബിള്‍ പൊട്ടി വീഴുകയായിരുന്നു. ഇരുമ്പു കമ്പിയില്‍ കെട്ടിയുറപ്പിച്ചിരുന്ന കേബിള്‍ വളരെയേറെ താഴ്ന്ന് കിടക്കുകയായിരുന്നു.
പൊട്ടിയ കേബിള്‍ കമ്പി സഹിതം വൈദ്യുതി ലൈനില്‍ വീഴുകയും, ഇതിന്റെ ഒരു ഭാഗം ബസിന് മുകളില്‍ പതിക്കുകയും ചെയ്തു. അപകടം മനസിലാക്കിയ ഡ്രൈവര്‍ വാഹനം മുന്നോട്ടു ചലിപ്പിക്കാതെ ബസിലുണ്ടായിരുന്ന വിദ്യാര്‍ഥികളെയും സ്‌കൂള്‍ ജീവനക്കാരെയും പെട്ടന്നുതന്നെ വാഹനത്തിനു പുറത്തേക്കിറക്കി സുരക്ഷിതരായി നിര്‍ത്തി. തുടര്‍ന്ന് ബസ് സ്ഥലത്തുതന്നെ നിറുത്തിയിട്ടു. വിവരമറിയിച്ചതിനെ തുടര്‍ന്ന് സ്ഥലത്തെത്തിയ കെ.എസ്.ഇ.ബി ഉദ്യോഗസ്ഥരും നാട്ടുകാരും ചേര്‍ന്നാണ് വാഹനത്തിന്റെ മുകളില്‍ നിന്നും വൈദ്യുതി പ്രവാഹമുള്ള കമ്പി മാറ്റിയത്.