സ്വന്തം ലേഖകന്‍

തിരുവനന്തപുരം: സ്പ്രിംഗ്ലര്‍ വിവാദം കത്തുന്നതിനിടെ അപ്രത്യക്ഷമാവുകയും, പിന്നീട് കഴിഞ്ഞ ദിവസം പ്രത്യക്ഷപ്പെടുകയും ചെയ്ത എക്‌സലോജിക് വെബ്‌സൈറ്റില്‍നിന്നു നാലു പേരുടെ പേരുകള്‍ മറച്ചു. 

മുഖ്യമന്ത്രിയുടെ മകള്‍ വീണയാണ് എക്‌സലോജിക് സൊലൂഷന്‍സ് എന്ന കമ്പനിയുടെ മാനേജിങ് ഡയറക്ടര്‍. ഈ കമ്പനിയുടെ മാനേജിങ് പാര്‍ട്ണറായ ദീപക് സായിബാബ, കണ്‍സള്‍ട്ടന്റുമാരായ ബൊയാന്‍ ദിമിത്രോ, ജെയ്ക്ക് ബാലകുമാര്‍, സൗരഭ് അഗര്‍വാള്‍ എന്നിവരുടെ പേരുകള്‍ മറച്ചാണ് വെബ്‌സൈറ്റ് വീണ്ടും പ്രത്യക്ഷപ്പെട്ടത്. 

കമ്പനിയെ സംബന്ധിക്കുന്ന അടിസ്ഥാന വിവരങ്ങളും എക്‌സലോജികിന്റെ വെബ്‌സൈറ്റില്‍നിന്നു മറച്ചിട്ടുണ്ട്. പേര് മറയ്ക്കപ്പെട്ടവരില്‍ ജയ്ക്ക് ബാലകുമാര്‍ ഡയറക്ടറായ മറ്റൊരു അന്താരാഷ്ട്രാ കമ്പനി സംസ്ഥാന സര്‍ക്കാരിന്റെ പല വന്‍കിട പദ്ധതികളുടെയും ഭാഗമായിട്ടു പ്രവര്‍ത്തിക്കുന്നുണ്ട്. 

നിലവില്‍ വിവാദത്തിലായ സ്പ്രിംഗ്ലര്‍ കമ്പനിയുമായി മുഖ്യമന്ത്രിയുടെ മകളുടെ കമ്പനിയായ എക്‌സലോജികിന് എന്തെങ്കിലും ബന്ധമുണ്ടോയെന്ന ചോദ്യം പ്രതിപക്ഷം ഉയര്‍ത്തിയിട്ടുണ്ട്.