മസ്‌കറ്റ്:ഒമാനില്‍ പുതിയതായി 98 കൊവിഡ് കേസുകള്‍ കൂടി സ്ഥിരീകരിച്ചതായി ആരോഗ്യമന്ത്രലയം അറിയിച്ചു.ഇതോടെ രാജ്യത്തെ കൊവിഡ് കേസുകളുടെ എണ്ണം 1508 ആയി ഉയര്‍ന്നു.ഇന്ന് ഒരു കൊവിഡ് മരണം കൂടി റിപ്പോര്‍ട്ട് ചെയ്തു. മസ്‌കറ്റിലെ മത്ര സൂഖില്‍ ഷോപ്പ് നടത്തിയിരുന്ന 53 വയസ്സുള്ള ബംഗ്ലാദേശ് സ്വദേശിയാണ് മരിച്ചത്. രണ്ട് സ്വദേശിയും 6 വിദേശിയും അടക്കം എട്ട് പേര്‍ മരണത്തിന് കീഴടങ്ങി.238 പേര്‍ രോഗമുക്തി നേടി.

മസ്‌കറ്റ് ഗവര്‍ണറേറ്റില്‍ ലോക്ക്ഡൗണ്‍ മെയ് 8 വരെ നീട്ടിയതായി ഒമാന്‍ ടിവി ഓണ്‍ലൈനില്‍ പുറത്തിറക്കിയ പ്രസ്താവനയില്‍ പറഞ്ഞു. കൊറോണ വൈറസിന്റെ വ്യാപനം തടയുന്നതിന്റെ ഭാഗമായി മസ്‌കറ്റ് മേഖല കഴിഞ്ഞ ഏപ്രില്‍ 10 മുതല്‍ അടഞ്ഞ് കിടക്കുകയാണ്. ലോക്ക്ഡൗണ്‍ ഏപ്രില്‍ 22 വരെ പ്രാബല്യത്തില്‍ ഉണ്ടാകുമെന്നായിരുന്നു നേരത്തെ അറിയിച്ചിരുന്നത്.അതാണിപ്പോള്‍ നീട്ടിയിരിക്കുന്നത്.

ഇന്ന് റിപ്പോര്‍ട്ട് ചെയ്ത കേസുകളില്‍ 53 പേരും മസ്‌കറ്റില്‍ നിന്നാണ്.ഇതോടെ മസ്‌കറ്റിലെ രോഗബാധിതരുടെ എണ്ണം 1164 ആയി.
രാജ്യത്തെ രോഗബാധിതരില്‍ 77 ശതമാനവും മസ്‌കറ്റ് മേഖലയില്‍ നിന്നാണ്. ഇതാണ് ലോക്ക് ഡൗണ്‍ നീട്ടാന്‍ കാരണം.റമദാനില്‍ പള്ളികള്‍ അടഞ്ഞ് കിടക്കും.സമൂഹനോമ്പുതുറക്കും വിലക്ക് ഏര്‍പ്പെടുത്തിയിട്ടുണ്ട്.

ഇന്ന് റിപ്പാര്‍ട്ട് ചെയ്ത 98 കേസുകളില്‍ 59 വിദേശികളും 39 സ്വദേശികളും ആണ് ഉള്ളത്. ഇതോടെ രോഗബാധിതരായ വിദേശികളുടെ എണ്ണം 955 ഉം സ്വദേശികളുടെ എണ്ണം 553 ഉം ആയി ഉയര്‍ന്നു. ഇത് കാണിക്കുന്നത് രാജ്യത്തെ കൊവിഡ്  ബാധിതരില്‍ 63 ശതമാനവും പ്രവാസികളാണെന്നാണ്.