മലപ്പുറം: കൊവിഡ് 19 രോഗ പ്രതിരോധത്തിനൊപ്പം പൊതുജനക്ഷേമവും ഉറപ്പാക്കിയ കേരള മാതൃകയെ ലോക്‌സഭ സ്പീക്കര്‍ ഓം ബിര്‍ള അഭിനന്ദിച്ചതായി സ്പീക്കര്‍ പി. ശ്രീരാമകൃഷ്ണന്‍. രാജ്യത്തെ നിയമസഭാ സ്പീക്കര്‍മാരുമായി ലോക്‌സഭ സ്പീക്കര്‍ നടത്തിയ വീഡിയോ കോണ്‍ഫറന്‍സില്‍ പങ്കെടുത്ത ശേഷം സംസാരിക്കുകയായിരുന്നു ശ്രീരാമകൃഷ്ണന്‍.
മറ്റു സംസ്ഥാനങ്ങള്‍ രോഗപ്രതിരോധ പ്രവര്‍ത്തനങ്ങളില്‍ മാത്രം ശ്രദ്ധ കേന്ദ്രീകരിച്ചപ്പോള്‍ ലോക്ഡൗണില്‍ വീടുകളിലായിപ്പോയ ജനങ്ങളുടെ ക്ഷേമം ഉറപ്പാക്കാന്‍ കേരളത്തില്‍ സ്വീകരിച്ച നടപടികള്‍ ഓം ബിര്‍ള പ്രശംസിച്ചു. സാമൂഹിക അടുക്കളകള്‍ വഴി ഭക്ഷണ ലഭ്യത ഉറപ്പു വരുത്തിയതും അതിഥി തൊഴിലാളികള്‍ക്ക് ഭക്ഷണവും കരുതലും ഉറപ്പാക്കിയതും ഓം ബിര്‍ള പ്രത്യേകം അഭിനന്ദിച്ചതായും ശ്രീരാമകൃഷ്ണന്‍ പറഞ്ഞു.