തൊടുപുഴ: മറ്റൊരു കേസില്‍ തെളിവെടുപ്പിനെത്തിച്ച യുവാവിന്റെ വീട്ടില്‍നിന്നും വാടകയ്‌ക്കെടുത്ത ഹോം സ്റ്റേകളില്‍ നിന്നുമായി 12,58,000 രൂപയുടെ കള്ളനോട്ട് കണ്ടെത്തി. സംഭവത്തില്‍ കൊല്ലം വരാലഴികത്ത് ഹനീഫ് ഷിറോസിനെ (33) ഉപ്പുതറ പൊലിസ് അറസ്റ്റ് ചെയ്തു.   2,000, 500, 200 രൂപയുടെ നോട്ടുകളാണ് കണ്ടെടുത്തത്.

രണ്ടാം ഭാര്യയുടെ അഞ്ചര വയസുള്ള മകനെ ചട്ടുകം പഴുപ്പിച്ച് പൊള്ളിച്ച കേസിലാണ് ഇയാള്‍ പിടിയിലായത്. ഇയാളെ പീരുമേടിന് സമീപം മാട്ടുതാവളത്തെ വീട്ടിലെത്തിച്ച് മഹസര്‍ തയാറാക്കുന്നതിനിടെ കള്ളനോട്ട് പൊലിസിന്റെ ശ്രദ്ധയില്‍പ്പെടുകയായിരുന്നു. 

തുടര്‍ന്നുള്ള പരിശോധനയിലാണ് കട്ടിലിനടിയിലും അലമാരയിലും സൂക്ഷിച്ച 15,900 രൂപയുടെ കള്ളനോട്ട് കണ്ടെടുത്തത്. ചോദ്യം ചെയ്യലില്‍ വാഗമണ്ണിലും തേക്കടിയിലും വാടകക്കെടുത്ത ഹോം സ്റ്റേകളെ കുറിച്ച് വിവരം ലഭിച്ചു. തുടര്‍ന്ന് നടത്തിയ പരിശോധനയില്‍ തേക്കടിയില്‍നിന്ന് പ്രിന്ററും വാഗമണ്ണില്‍നിന്ന് 12,42,100 രൂപയുടെ കള്ളനോട്ടും കണ്ടെടുത്തു.

കൊല്ലം തടിക്കാട് കുടുംബവക ട്രസ്റ്റിന്റെ കീഴിലുള്ള എ.കെ.എം വൊക്കേഷനല്‍ ഹയര്‍ സെക്കന്‍ഡറി സ്‌കൂള്‍ മാനേജരായിരിക്കെ ആദ്യ ഭാര്യയുമായി ഉണ്ടായ അവകാശ തര്‍ക്കത്തെ തുടര്‍ന്ന് 2019ല്‍ ഇയാള്‍ മാട്ടുതാവളത്തേക്ക് താമസം മാറ്റി. ഒറ്റപ്പാലം സ്വദേശിനിയായ മറ്റൊരു സ്ത്രീയും ഒപ്പംകൂടി. ഈ സമയത്താണ് ഇവരുടെ മകനെ മര്‍ദിക്കുകയും ചട്ടുകം കൊണ്ട് ശരീരം പൊള്ളിക്കുകയും ചെയ്തത്. 

പിണങ്ങിപ്പോയ രണ്ടാം ഭാര്യയാണ് കുട്ടിയെ പൊള്ളിച്ചതിന് ഒറ്റപ്പാലം പൊലിസില്‍ പരാതി നല്‍കിയത്. കേസ് ഉപ്പുതറ പൊലിസിനു കൈമാറിയതറിഞ്ഞ് ഇയാള്‍ മുങ്ങി. വീട്ടിലെത്തിയ വിവരമറിഞ്ഞ പൊലിസ് ചൊവ്വാഴ്ച ഇയാളെ കസ്റ്റഡിയിലെടുക്കുകയായിരുന്നു.  തുടര്‍ന്നാണ് കള്ളനോട്ട് കണ്ടെടുത്തതും ഇന്നലെ വീണ്ടും അറസ്റ്റ് ചെയ്തതും. 

നോട്ട് എവിടെയൊക്കെ വിപണനം നടത്തിയെന്നും കൂടുതല്‍ പ്രതികള്‍ ഉണ്ടോയെന്നും പൊലിസ് അന്വേഷിക്കുന്നുണ്ട്.

കട്ടപ്പന ഡിവൈ.എസ്.പി. എന്‍.സി രാജ്‌മോഹന്‍, ഉപ്പുതറ സി.ഐ എസ്.എം റിയാസ്, എസ്.ഐമാരായ ചാര്‍ളി തോമസ്, സിബി എന്‍. തങ്കപ്പന്‍, ഉദോഗസ്ഥരായ പി.എന്‍ ദിനേശ്, പി.എച്ച് ഹനീഷ്, ഐബി ഏബ്രഹാം, ശരണ്യമോള്‍ പ്രസാദ് എന്നിവരടങ്ങിയ സംഘമാണ് കേസ് അന്വേഷിച്ചത്. കോടതിയില്‍ ഹാജരാക്കി പ്രതിയെ  റിമാന്‍ഡ് ചെയ്തു.