തിരുവനന്തപുരം: ലോക്ക് ഡൗണിന്റെ പശ്ചാത്തലത്തില്‍ കുട്ടികളുടെ സര്‍ഗശേഷി പ്രകാശിപ്പിക്കുന്നതിനായി നടപ്പിലാക്കിയ അക്ഷരവൃക്ഷം പദ്ധതിയിലേക്ക് ഇതുവരെ ലഭിച്ചത് 40,000ല്‍ പരം രചനകള്‍. വീടുകള്‍ക്കുള്ളില്‍ അവധിക്കാലം ചെലവഴിക്കുന്ന കുട്ടികളുടെ സര്‍ഗശേഷി പ്രകാശിപ്പിക്കുന്നതിനു വേണ്ടിയാണ് പൊതുവിദ്യാഭ്യാസ വകുപ്പ് 'അക്ഷരവൃക്ഷം' പദ്ധതി നടപ്പിലാക്കിയത്. 

പരിസ്ഥിതി, ശുചിത്വം, രോഗപ്രതിരോധം എന്നീ വിഷയങ്ങളെ ആസ്പദമാക്കി കഥ, കവിത, ലേഖനം എന്നിവ രചിക്കാനുള്ള അവസരം ആയിരക്കണക്കിന് വിദ്യാര്‍ഥികള്‍ വിനിയോഗിച്ചു. 

ഈ മൂന്നു വിഭാഗങ്ങളിലായാണ് 40000ല്‍ പരം രചനകള്‍ ലഭിച്ചത്. ഇവയില്‍ നിന്ന് ആദ്യത്തെ 10,000 രചനകളില്‍ കൊവിഡ് സംബന്ധിയായ സൃഷ്ടികള്‍ മാത്രം ഉള്‍പ്പെടുത്തി ആദ്യവോള്യം തയാറാക്കി. 148 കവിതകളും 76 കഥകളും 94 ലേഖനങ്ങളും ഈ വോള്യത്തില്‍ ഉള്‍പ്പെടുത്തിയിട്ടുണ്ട്. കഥ, കവിത, ലേഖനം എന്നിങ്ങനെ മൂന്നു സമാഹാരങ്ങളായി പ്രസിദ്ധീകരിച്ചിട്ടുള്ള ഈ പുസ്തകങ്ങള്‍ മുഖ്യമന്ത്രി പിണറായി വിജയന്‍ പ്രകാശനം ചെയ്തു. 

അടച്ചിടല്‍ നിര്‍ബന്ധിതമാക്കാന്‍ ഇടയായ സാഹചര്യത്തെ സംബന്ധിച്ച കൃത്യമായ ബോധം, നമ്മുടെ കടമകളേയും ന്യൂനതകളേയും കുറിച്ചുള്ള സൂക്ഷ്മമായ തിരിച്ചറിവ്, സര്‍ഗശേഷിയുടെ ചാരുത, അതോടൊപ്പം കൂട്ടിലടക്കപ്പെട്ട ബാല്യത്തിന്റെ വേദന ഇവയെല്ലാം ഈ രചനകളില്‍ പ്രതിഫലിക്കുന്നുണ്ട്. 

കുട്ടികളുടെ രചനകള്‍ പൊതുസമൂഹം ആസ്വദിക്കേണ്ടതാണ് എന്നു കണ്ടുകൊണ്ടാണ് എസ്.സി.ഇ.ആര്‍.ടി ഇവയില്‍ ചിലത് പുസ്തക രൂപത്തില്‍ പ്രസിദ്ധീകരിക്കുന്നത്. 

മെയ് അഞ്ചുവരെ ലഭിക്കുന്ന രചനകള്‍ കൂടി ഇത്തരത്തില്‍ പരിശോധിച്ച് എസ്.സി.ഇ.ആര്‍.ടി പുസ്തകങ്ങളാക്കി പ്രസിദ്ധീകരിക്കും. രചനകള്‍ അയച്ച കുട്ടികളെയും അവര്‍ക്ക് പിന്തുണ നല്‍കിയ അധ്യാപകരേയും പൊതുവിദ്യാഭ്യാസ വകുപ്പിന്റെ ഭാഗമായ എല്ലാവരെയും അഭിനന്ദിക്കുന്നതായി മന്ത്രി സി. രവീന്ദ്രനാഥ് അറിയിച്ചു.