മൂവാറ്റുപുഴ: നിയമ പഠനരംഗത്തെ പ്രവേശന പരീക്ഷയായ സെന്‍ട്രല്‍ ലോ അക്കാദമിയുടെ ക്ലാറ്റ്, കേരള ലോ അക്കാദമിയുടെ ക്ലാ എന്നിവയ്ക്ക് അപേക്ഷിക്കാനാകാതെ വിദ്യാര്‍ഥികള്‍. 

ലോക്ക് ഡൗണിനെ തുടര്‍ന്ന്  അക്ഷയ കേന്ദ്രങ്ങളും മറ്റും തുറക്കാത്തതാണ് വിദ്യാര്‍ഥികളെയും രക്ഷിതാക്കളെയും ആശങ്കയിലാക്കുന്നത്. ക്ലാറ്റ് അപേക്ഷ സ്വീകരിക്കുന്ന അവസാന തിയതി 25 ആണ്.  ക്ലാ പരീക്ഷക്ക് അപേക്ഷിക്കാന്‍ മെയ് അഞ്ചുവരെ സമയമുണ്ട്. പ്ലസ്ടു ജയിച്ചവര്‍ക്കും ഫലം കാത്തിരിക്കുന്നവര്‍ക്കുമാണ് അപേക്ഷ സമര്‍പ്പിക്കാന്‍ കഴിയുക. എന്നാല്‍, ഹയര്‍സെക്കന്‍ഡറി പരീക്ഷ ഇതുവരെ പൂര്‍ത്തിയാകാത്ത സാഹചര്യത്തില്‍ ഈ വര്‍ഷത്തെ ലോ   കോളജ് പ്രവേശനം അനിശ്ചിതത്വത്തിലാകാനും സാധ്യതയുണ്ട്. 

കൂടാതെ എന്‍ട്രന്‍സ് പരീക്ഷാ പരിശീലന കേന്ദ്രങ്ങളും അടഞ്ഞുകിടക്കുകയാണ്. പുസ്തകം വാങ്ങി സ്വയം തയാറാകണമെങ്കില്‍ അത്തരം കടകളും അടഞ്ഞുകിടക്കുന്നു. 24 മുതല്‍ അക്ഷയ കേന്ദ്രങ്ങള്‍ തുറക്കാമെന്ന സര്‍ക്കാര്‍ തീരുമാനം പ്രാവര്‍ത്തികമായാല്‍ മാത്രമേ ഇത്തരം പ്രവേശന പരീക്ഷകള്‍ക്ക് അപേക്ഷ സമര്‍പ്പിക്കാനാകൂ.