കൊച്ചി: ലോക്ക് ഡൗണ്‍ സാഹചര്യത്തില്‍ വിദ്യാഭ്യാസ പ്രവര്‍ത്തനങ്ങള്‍ തടസപ്പെടുന്നത് കണക്കിലെടുത്ത് പുതിയ പദ്ധതികള്‍ക്കു രൂപംനല്‍കി കേന്ദ്ര മാനവ വിഭവശേഷി മന്ത്രാലയം. വീട്ടിലിരിക്കുന്ന അപ്പര്‍ പ്രൈമറി വിദ്യാര്‍ഥികള്‍ക്ക് അധ്യാപകരുടെയും മാതാപിതാക്കളുടെയും സഹായത്തോടെ പഠനപ്രവര്‍ത്തനങ്ങള്‍ നടത്താന്‍ എന്‍.സി.ഇ.ആര്‍.ടി ബദല്‍ അക്കാദമിക കലണ്ടര്‍ പുറത്തിറക്കി. പ്രൈമറി വിഭാഗത്തിനുള്ള കലണ്ടര്‍ നേരത്തെ ഇറക്കിയിരുന്നു.വിദ്യര്‍ഥികള്‍ക്കും രക്ഷിതാക്കള്‍ക്കും അധ്യാപകര്‍ക്കും ഒരുപോലെ ഉപയോഗിക്കാവുന്ന രസകരമായ സമൂഹമാധ്യമ സാങ്കേതിക ഉപകരണങ്ങള്‍ കലണ്ടറില്‍ ലഭ്യമാണെന്ന് കേന്ദ്രമന്ത്രി രമേഷ് പൊഖ്‌റിയാല്‍ നിശാങ്ക് പറഞ്ഞു.
മൊബൈല്‍ ഫോണ്‍, റേഡിയോ, ടെലിവിഷന്‍, എസ്.എം.എസ്, വിവിധ സമൂഹമാധ്യമ ഉപകരണങ്ങള്‍ എല്ലാം അടിസ്ഥാനപ്പെടുത്തിയാണിത്. ഇന്റര്‍നെറ്റ് ഇല്ലാത്ത വിദ്യാര്‍ഥികള്‍ക്ക് ഫോണില്‍ എസ്.എം.എസോ, വോയ്‌സ് കോളോ വഴി കലണ്ടര്‍ ഉപയോഗിക്കാം. വിദ്യാര്‍ഥികളെ കലണ്ടര്‍ ഉപയോഗിക്കുന്നതിന് അധ്യാപകരും രക്ഷിതാക്കളും സഹായിക്കണമെന്ന് മന്ത്രി ആവശ്യപ്പെട്ടു. ഹൈസ്‌കൂള്‍ ഹയര്‍ സെക്കന്‍ഡറി ബദല്‍ കലണ്ടര്‍ ഉടന്‍ ലഭ്യമാക്കുമെന്നും മന്ത്രി പറഞ്ഞു.