ചത്തീസ്ഗഢ്: കൊവിഡ് പ്രതിരോധ പ്രവര്‍ത്തനങ്ങള്‍ക്ക് കേന്ദ്രസര്‍ക്കാര്‍ മതിയായ സാമ്പത്തികസഹായം നല്‍കുന്നില്ലെന്ന് പഞ്ചാബും. കൊവിഡ് സാരമായി ബാധിച്ച സംസ്ഥാനത്തിന് കേന്ദ്രം 71 കോടി രൂപ മാത്രമാണ് സഹായധനമായി അനുവദിച്ചതെന്ന് പഞ്ചാബ് ധനമന്ത്രി മന്‍പ്രീത് സിങ് ബാദല്‍ പറഞ്ഞു. ഓരോ ജില്ലയ്ക്കും മൂന്നു കോടി വീതം നല്‍കാന്‍ പോലും ഇതു തികയില്ലെന്ന് ധനമന്ത്രി പറഞ്ഞു.

കേന്ദ്രം വേണ്ടത്ര തുക സംസ്ഥാനത്തിന് അനുവദിച്ചിട്ടുണ്ടെന്ന കേന്ദ്രമന്ത്രി ഹര്‍സിമ്രത് കൗര്‍ ബാദലിന്റെ പ്രസ്താവന പച്ച കള്ളമാണ്. ഈ സമയത്ത് വിലകുറഞ്ഞ രാഷ്ട്രീയം കളിക്കാതെ സംസ്ഥാനത്തിന് അര്‍ഹതപ്പെട്ട  ജി.എസ്.ടി ആനുകൂല്യം ലഭ്യമാക്കാന്‍ ശ്രമിക്കണമെന്നും മന്ത്രി പറഞ്ഞു.

കേന്ദ്ര സര്‍ക്കാര്‍ സംസ്ഥാന സര്‍ക്കാരിന് കൊവിഡ് പ്രതിരോധത്തിന് 832 കോടി രൂപയും ഭക്ഷ്യധാന്യങ്ങളും നല്‍കിയിട്ടുണ്ടെന്നും എന്നാല്‍ സംസ്ഥാന സര്‍ക്കാര്‍ പാവങ്ങള്‍ക്ക് അവ വിതരണം ചെയ്യുന്നില്ലെന്നും ശിരോമണി അകാലിദള്‍ നേതാവും കേന്ദ്ര ഭക്ഷ്യമന്ത്രിയുമായ ഹര്‍സിമ്രത് കൗര്‍ കുറ്റപ്പെടുത്തിയിരുന്നു.  

നേരത്തെ സംസ്ഥാനത്തിന് ജി.എസ്.ടി ആനുകൂല്യം ഇതുവരെ അനുവദിക്കാത്ത കേന്ദ്ര സര്‍ക്കാര്‍ ഒരു ലക്ഷം റാപിഡ് ടെസ്റ്റ് കിറ്റുകള്‍ വേണ്ടിടത്ത് 10,000 ചൈനീസ് നിര്‍മിത കിറ്റുകള്‍ മാത്രമാണ് നല്‍കിയതെന്ന് പഞ്ചാബ് മുഖ്യമന്ത്രി അമരീന്ദര്‍ സിങ് വിമര്‍ശിച്ചിരുന്നു. 

കോണ്‍ഗ്രസ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരെല്ലാം കേന്ദ്രം കൊവിഡ് പ്രതിരോധത്തിന് വേണ്ട സഹായം നല്‍കുന്നില്ലെന്ന് വ്യക്തമാക്കിയിരുന്നു. സംസ്ഥാനങ്ങള്‍ക്ക് സാമ്പത്തിക പാക്കേജ് അനുവദിക്കാത്തതിനെതിരേ പഞ്ചാബ്, രാജസ്ഥാന്‍, ഛത്തീസ്ഗഢ്, പുതുച്ചേരി മുഖ്യമന്ത്രിമാരാണ് രംഗത്തെത്തിയത്. 

കേന്ദ്രം സംസ്ഥാനങ്ങള്‍ക്കുള്ള ധനസഹായം നല്‍കുന്നതില്‍ വീഴ്ച വരുത്തിയാല്‍ കൊവിഡ് പ്രതിരോധ പ്രവര്‍ത്തനങ്ങള്‍ വേണ്ടരീതിയില്‍ നടക്കില്ലെന്ന് രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ട് പറഞ്ഞു. 

സംസ്ഥാനങ്ങള്‍ക്ക് സഹകരണവും സാമ്പത്തിക പാക്കേജും അനുവദിക്കാതെ എങ്ങനെയാണ് കൊവിഡിനെതിരേ പോരാടുകയെന്ന് ചത്തീസ്ഗഢ് മുഖ്യമന്ത്രി ഭൂപേഷ് ബാഗലും ചോദിച്ചു. 600 കോടിയുടെ ജി.എസ്.ടി വിഹിതവും 2,200 കോടിയുടെ ഫിനാന്‍ഷ്യല്‍ കമ്മിഷന്‍ വിഹിതവും കേന്ദ്രം ഇതുവരെ പുതുച്ചേരിക്ക് കൈമാറിയിട്ടില്ലെന്നു പുതുച്ചേരി മുഖ്യമന്ത്രി വി. നാരായണ സ്വാമി അറിയിച്ചു.