തിരുവനന്തപുരം: സംസ്ഥാനമൊട്ടാകെയുള്ള വ്യാപാര സ്ഥാപനങ്ങളില്‍ ക്രമക്കേട് നടക്കുന്നതായി വിജിലന്‍സ് കണ്ടെത്തല്‍. കഴിഞ്ഞ ദിവസം 414 വ്യാപാര സ്ഥാപനങ്ങളില്‍ വിജിലന്‍സ് പരിശോധന നടത്തിയതില്‍ 186 സ്ഥാപനങ്ങളിലാണ് ക്രമക്കേട് കണ്ടെത്തിയത്. ക്രമക്കേട് കണ്ടെത്തിയതിനെ തുടര്‍ന്ന് ഈ സ്ഥാപന ഉടമകള്‍ക്കെതിരെ നടപടിക്ക് വിജിലന്‍സ് ശുപാര്‍ശ ചെയ്തു.
തിരുവനന്തപുരം ജില്ലയില്‍ 67 വ്യാപാരസ്ഥാപനങ്ങള്‍ക്കെതിരെയും, കൊല്ലത്ത് 31ഉം, കോട്ടയത്ത് 22ഉം, കോഴിക്കോട്ട് 13ഉം, എറണാകുളത്ത് 12ഉം ഉള്‍പ്പെടെയാണ് 186 സ്ഥാപനങ്ങള്‍ക്കെതിരെ നടപടികള്‍ക്ക് വിജിലന്‍സ് ശുപാര്‍ശ ചെയ്തത്.
പരിശോധനയില്‍ ചില വ്യാപാരികള്‍ നിത്യോപയോഗ സാധനങ്ങള്‍ക്ക് വില കൂടുതല്‍ ഈടാക്കുന്നതായും, ചിലര്‍ വന്‍തോതില്‍ സാധനങ്ങള്‍ വാങ്ങി സംഭരിക്കുന്നതായും കണ്ടെത്തി. ഒട്ടുമിക്ക വ്യാപാര സ്ഥാപനങ്ങളും വില വിവര പട്ടിക പ്രദര്‍ശിപ്പിച്ചിട്ടില്ല. മാത്രമല്ല, പച്ചക്കറികള്‍ക്കും പഴവര്‍ഗങ്ങള്‍ക്കും അമിത വില ഈടാക്കുന്നു.
വില പ്രദര്‍ശിപ്പിച്ചിട്ടുള്ള കടകളില്‍ വിലവിവര പട്ടികയില്‍ ഉള്ളതിനേക്കാള്‍ കൂടുതല്‍ തുകയാണ് ചില നിത്യോപയോഗ സാധനങ്ങള്‍ക്ക് ഈടാക്കി വരുന്നതെന്നും വിജിലന്‍സ് കണ്ടെത്തി. വരും ദിവസങ്ങളിലും പരിശോധനകള്‍ തുടരുമെന്ന് വിജിലന്‍സ് ഡയരക്ടര്‍ അനില്‍ ശ്രീകാന്ത് അറിയിച്ചു.