കൊച്ചി: കൊവിഡിനെതിരായ പ്രതിരോധ പ്രവര്‍ത്തനത്തിനിടെ ക്ഷയ രോഗബാധയ്ക്ക് ചികിത്സ തേടുന്നവരെ കൂടുതല്‍ ശ്രദ്ധിക്കാന്‍ കേന്ദ്ര ആരോഗ്യ കുടുംബക്ഷേമ മന്ത്രാലയം സംസ്ഥാനത്തിന് നിര്‍ദേശം നല്‍കി.
ചുമ, പനി, ശ്വാസംമുട്ടല്‍ തുടങ്ങിയവ കൊവിഡിനെന്നപോലെ ക്ഷയരോഗത്തിനും ഉണ്ടാവുന്നുണ്ട്. ക്ഷയ രോഗത്തിന് ചികിത്സയിലുള്ളവര്‍ക്ക് കൊവിഡ് പിടിപെടാനുള്ള സാധ്യത മുന്നില്‍ക്കണ്ടാണ് കേന്ദ്ര നിര്‍ദേശം. പൊതുവേ ശ്വാസം മുട്ടല്‍ ഉള്ള രോഗികളില്‍ കൊവിഡ് ബാധയുണ്ടായാല്‍ ഗുരുതരമാവുമെന്ന് നേരത്തേതന്നെ മുന്നറിയിപ്പ് നല്‍കിയിരുന്നതാണ്.
ക്ഷയ രോഗികള്‍ ഇന്ത്യയില്‍ ചില സംസ്ഥാനങ്ങളില്‍ കൂടുതലാണെന്ന് കണ്ടാണ് ഇതു സംബന്ധിച്ച മുന്നറിയിപ്പ്.
കേരളത്തില്‍ നിലവില്‍ ക്ഷയരോഗ ബാധ അടുത്തിടെ ചില ഒറ്റപ്പെട്ട കേന്ദ്രങ്ങളില്‍ റിപ്പോര്‍ട്ട് ചെയ്യപ്പെട്ടിരുന്നു.
കൊവിഡ് ശ്വാസകോശ സംബന്ധമായ രോഗമായാണ് മരണത്തിന് കാരണമാകുന്നത്. ക്ഷയരോഗവും ശ്വാസകോശ രോഗമായതിനാല്‍ ഏറെ സൂക്ഷിക്കേണ്ടതുണ്ടെന്നാണ് മുന്നറിയിപ്പ്. പുതുതായി ക്ഷയരോഗം സ്ഥിരീകരിച്ചവര്‍ക്കും ചികിത്സയിലുളളവര്‍ക്കും ഒരു മാസത്തേക്കുള്ള മരുന്നുകള്‍ നല്‍കണമെന്നും നിര്‍ദേശമുണ്ട്.