ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്സ് സെമി കാണാതെ പുറത്ത്. ഒഡീഷയ്ക്കെതിരെ നടന്ന പ്ലേ ഓഫ് മത്സരത്തില്‍ ഒന്നിനെതിരെ രണ്ട് ഗോളുകള്‍ക്കാണ് ബ്ലാസ്റ്റേഴ്സ് പരാജയപ്പെട്ടത്. ആദ്യം ലീഡെടുത്ത ബ്ലാസ്റ്റേഴ്സ് അധിക സമയത്താണ് വിജയം കൈവിട്ടത്. ഇതോടെ ഒഡീഷ സെമി ഫൈനലിലേക്ക് ടിക്കറ്റെടുത്തു.98ാം മിനിറ്റില്‍ ഐസക് റാല്‍ത്തെയാണ് ഒഡിഷയുടെ വിജയ ഗോള്‍ നേടിയത്. ഗോള്‍ മടക്കാന്‍ ബ്ലാസ്റ്റേഴ്‌സ് താരങ്ങള്‍ കിണഞ്ഞുശ്രമിച്ചെങ്കിലും ഫലമുണ്ടായില്ല. 

മത്സരത്തില്‍ ഒഡിഷ നേടിയ രണ്ടു ഗോളുകള്‍ക്കും റോയ് കൃഷ്ണയാണ് വഴിയൊരുക്കിയത്. നിശ്ചിത സമയത്ത് ബ്ലാസ്റ്റേഴ്‌സിനായി ഫെദോര്‍ സെര്‍നിച്ചും ഒഡിഷക്കായി ഡീഗോ മൗറീഷ്യോയും വലകുലുക്കി.സെമിയില്‍ ഒഡിഷ നിലവിലെ ജേതാക്കളായ മോഹന്‍ ബഗാന്‍ സൂപ്പര്‍ ജയന്റ്‌സുമായി ഏറ്റുമുട്ടും.