കൊച്ചി: ഉത്സവത്തിനിടെ ഇടഞ്ഞ് പരിഭ്രാന്തി പരത്തിയ ആനകളെ മയക്കുവെടി വച്ച് തളച്ചു. എറണാകുളം ചളിക്കവട്ടം പടിഞ്ഞാറേ കുഴിവേലി ക്ഷേത്രത്തില്‍ ഉത്സവത്തിനെത്തിച്ച മുല്ലാത്ത് വിജേഷ്, ദേവിപ്രിയന്‍ എന്നീ ആനകളാണ് ഇടഞ്ഞത്. ഉത്സവത്തിനിടെ മുല്ലാത്ത് വിജേഷ് എന്ന ആന ഇടയുകയും സമീപത്തുണ്ടായിരുന്ന ദേവിപ്രിയനെ കുത്തുകയുമായിരുന്നു. ഇതോടെ ദേവിപ്രിയനും വിരണ്ടോടി. രണ്ട് ആനകളും ഒരു മണിക്കൂറോളം പ്രദേശത്ത് പരിഭ്രാന്തി പരത്തി.
അമ്പലത്തിനു മുന്നിലെ റോഡിലൂടെ വിരണ്ടോടിയ ദേവിപ്രിയന്‍ മറ്റൊരു വീട്ടുപറമ്പില്‍ നിലയുറപ്പിച്ചു.
അതേസമയം മുല്ലാത്ത് വിജേഷ് സമീപത്തെ വീടുകളുടെ മതിലും ഗേറ്റുകളും തകര്‍ത്തു. മയക്കുവെടി വച്ചിട്ടും മയങ്ങാതിരുന്ന ആനകളെ കാലില്‍ വടം കെട്ടി ഏറെ പണിപ്പെട്ടാണ് തളച്ചത്.