മുംബൈ: ബീഫ് നിരോധനത്തില്‍ മലപ്പുറത്ത് കളം മാറ്റിച്ചവിട്ടിയ ബി.ജെ.പിയെ വെല്ലു വിളിച്ച് ശിവസേന. മുഖപത്രമായ സാമ്‌നയിലാണ് വെല്ലുവിളി. മലപ്പുറത്ത് ബീഫ് നിരോധിക്കാന്‍ ബി.ജെ.പിക്ക് ധൈര്യമുണ്ടോ എന്ന് ശിവസേന ചോദിക്കുന്നു.

മലപ്പുറം ഉപതെരഞ്ഞെടുപ്പില്‍ ജയിപ്പിച്ചാല്‍ മണ്ഡലത്തിലെങ്ങും നല്ല ബീഫ് എത്തിക്കുമെന്ന ബി.ജെ.പി സ്ഥാനാര്‍ഥി ശ്രീപ്രകാശിന്റെ പ്രതികരണം ചൂണ്ടിക്കാട്ടിയാണ് ശിവസേനയുടെ വിമര്‍ശനം.

ബീഫ് വിഷയത്തില്‍ ബി.ജെ.പിക്ക് ഇരട്ടത്താപ്പാണെന്നും ശിവസേന പരിഹസിക്കുന്നു. ഓരോ സംസ്ഥാനത്തും ബി.ജെ.പിക്ക് ഓരോ നിലപാടാണ്. ചിലസംസ്ഥാനങ്ങളില്‍ ഗോവധത്തിന് വധശിക്ഷയാണ്. മറ്റു ചിലയിടങ്ങളില്‍ ബി.ജെ.പി ഇക്കാര്യത്തില്‍ ഒന്നും മിണ്ടുന്നില്ല. രാജ്യത്തെമ്പാടും ഗോവധ നിരോധനത്തില്‍ ഒരേ നിയമം നടപ്പാക്കാന്‍ ബി.ജെ.പിക്ക് ധൈര്യമില്ലെന്നും സാമ്‌ന കുറ്റപ്പെടുത്തുന്നു.