മോസ്‌കോ: റഷ്യയിലെ സെന്റ് പീറ്റേഴ്‌സ്ബര്‍ഗിലെ മെട്രോ സ്‌റ്റേഷനില്‍ ഇരട്ട സ്‌ഫോടനം. സംഭവത്തില്‍ പത്തോളം പേര്‍ കൊല്ലപ്പെട്ടതായാണ് ഔദ്യോഗിക വിവരം. സെന്നായ മെട്രോ സ്‌റ്റേഷനുള്ളില്‍ വച്ച രണ്ടു മെട്രോ ക്യാരേജുകള്‍ പൊടുന്നനെ പൊട്ടിത്തെറിക്കുകയായിരുന്നു. നിരവധി പേര്‍ക്കു പരുക്കേറ്റിട്ടുണ്ട്. രക്ഷാപ്രവര്‍ത്തനം പുരോഗമിക്കുകയാണ്.

സ്‌ഫോടകവസ്തുവെന്നു തോന്നിക്കുന്ന ഒരു വസ്തുവാണ് പൊട്ടിത്തെറിച്ചതെന്നാണ് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തത്. നിരവധി യാത്രക്കാര്‍ പ്ലാറ്റ്‌ഫോമില്‍ രക്തത്തില്‍ കുളിച്ചു കിടക്കുകയായിരുന്നു. കുറേയാളുകള്‍ ഓടി മാറിയതിനാല്‍ സ്‌ഫോടനത്തില്‍ നിന്നും രക്ഷപ്പെട്ടു.

സ്‌ഫോടനത്തെത്തുടര്‍ന്ന് സെന്റ് പീറ്റേഴ്‌സ് ബര്‍ഗിലെ ഏഴു മെട്രോ സ്‌റ്റേഷനുകള്‍ താല്‍ക്കാലികമായി അടച്ചു. സംഭവസമയം റഷ്യന്‍ പ്രസിഡന്റ് വഌദ്മിര്‍ പുടിന്‍ സെന്റ് പീറ്റേഴ്‌സ് ബര്‍ഗ് നഗരത്തിലുണ്ടായിരുന്നു. 2010ല്‍ മോസ്‌കോ മെട്രോ സ്‌റ്റേഷനിലുണ്ടായ ഇരട്ട ചാവേര്‍ സ്‌ഫോടനത്തില്‍ 38 പേര്‍ കൊല്ലപ്പെട്ടിരുന്നു.