തളിപ്പറമ്പ്: തളിപ്പറമ്പ് സബ് ട്രഷറിയില്‍ പെന്‍ഷന്‍ വിതരണം തടസപ്പെട്ടതിനെത്തുടര്‍ന്ന് ബഹളം. അതിരാവിലെ തന്നെ പെന്‍ഷന്‍ വാങ്ങാന്‍ എത്തിയ വൃദ്ധരടക്കമുള്ള നൂറുകണക്കിന് പേര്‍ക്ക് ഓഫിസ് സമയമാരംഭിച്ച് മണിക്കൂറുകള്‍ കഴിഞ്ഞും പെന്‍ഷന്‍ ലഭിച്ചില്ല. അന്വേഷിച്ചപ്പോള്‍ സാങ്കേതിക തകരാറാണെന്നായിരുന്നു മറുപടി.
വീണ്ടും മണിക്കൂറുകള്‍ കഴിഞ്ഞിട്ടും പെന്‍ഷന്‍ വിതരണം വൈകിയതോടെ ട്രഷറിയില്‍ ബഹളമായി.
ഉച്ചയ്ക്കു 12.30നു ശേഷമാണ് പെന്‍ഷന്‍ വിതരണം തുടങ്ങിയത്. ഇതിനായി മൂന്ന് ടെല്ലര്‍ കൗണ്ടറുകളും ഏര്‍പ്പെടുത്തിയിരുന്നു.
പഴയങ്ങാടി സബ് ട്രഷറിയിലും വൈദ്യുതി നിലച്ചതിനാല്‍ പെന്‍ഷന്‍ വിതരണം മുടങ്ങി. ഇന്റര്‍നെറ്റ് സംവിധാനം കൂടി തകരാറായിലായതോടെ കാത്തിരുന്ന് മടുത്ത നൂറുകണക്കിനാളുകള്‍ മടങ്ങി.