കൊട്ടാരക്കര: തകര്‍ന്ന ഏനാത്ത് പാലത്തിന് താല്‍ക്കാലിക പരിഹാരമായി സൈന്യം നിര്‍മിക്കുന്ന ബെയ്‌ലിപാല നിര്‍മാണത്തിന് തുടക്കമായി. കഴിഞ്ഞ ദിവസം മിലിട്ടറി ആസ്ഥാനത്ത് നിന്ന് അന്തിമാനുമതി ലഭിച്ചതോടെ  ഇന്നലെ  രാവിലെ 5 മണിയോടെ സൈന്യം തുടക്കം കുറിച്ചു. നേരത്തെ തയാറാക്കി വച്ചിരുന്ന ഇരുമ്പ് കൊണ്ടുള്ള പാലത്തിന്റെ വിവധ ഭാഗങ്ങള്‍ കൂട്ടിയോജിപ്പിച്ച് ആറ്റിന് കുറുകെ സ്ഥാപിച്ച് തുടങ്ങി. വൈകുന്നേരമായപ്പോഴേക്കും ഒന്നാംഘട്ട പ്രവര്‍ത്തനങ്ങള്‍ മറുകര എത്തി. ഇതിന് മുകളില്‍ സ്റ്റീല്‍ പ്‌ളേറ്റുകളും, തൂണുകളും കൂട്ടിയോജിപ്പിക്കുന്നതോടെ രണ്ടാംഘട്ട പ്രവര്‍ത്തനങ്ങളും പൂര്‍ത്തിയാകും.
മൂന്ന് നാല് ദിവസത്തിനകം തന്നെ അന്തിമ നിര്‍മാണം പൂര്‍ത്തിയാക്കി പാലം കൈമാറാന്‍ കഴിയുമെന്നാണ് ഇപ്പോഴത്തെ പ്രവര്‍ത്തന പുരോഗതി വ്യക്തമാക്കുന്നത്. 180 അടി നീളത്തിലും, 10 അടി വീതിയിലുമാണ് 24 ടണ്‍ കപ്പാസിറ്റിയുള്ള പാലത്തിന്റെ നിര്‍മാണം. കമാണ്ടിങ് ഓഫിസര്‍ കേണല്‍ നീരജ്മാത്തൂര്‍, അസിസന്റ് കമാണ്‍ന്റ് മേജര്‍ അനില്‍ കോശി എന്നിവരുടെ നേതൃത്വത്തില്‍ 50 അംഗ സംഘമാണ് നിര്‍മാണത്തിലേര്‍പ്പെട്ടിരിക്കുന്നത്.